Election atana party te thurawn
Risk puitling hun lai hi chuan ziak ve chhawm zel ila, kum 2023 MLA inthlan ah hi chuan Congress hian party mi ni lo candidate thar an rawn phawrh siau dawn a, an fresh var var ang. ZPM hian an MLA neih sa ṭhenkhat an hahchawlhtir ngama candidate an uluk chuan sorkarna siam thei an ni. MNF hian Chief Ministerial Candidate thar siam ngamin tuna an President hi party president ni ringawt se an sorkar nawn leh ang.
Kan thu bul ṭanna hi rinthu niin a chhunzawmna pawh rinthu tho a ni dawn tih hre reng chung hian Congress aṭangin i han ṭan dawn teh ang u. India rama Political Party upa leh Mizorama rorel rei ber hian thar hluai anga awm an tum luatah 'Ṭhat loh theih lohna bawm' an ti a. A hma khan Pu Lalthanhawla ho khan an lo ṭha ngai lo tih an rawn hai lang a, Pu Hawla awm loh hnua ṭha thut anga lan an tumna hi Pu Hawla tan chuan chanchin ngaihnawm lo a ni.
Nimahselangin Pu Lalsawta hi mi huaisen leh mi dik a nih angin a sawi hmiah hmiah a, a sawi zingah hian kan hriat tur chu sum chungchang a ni ṭhin a, sum hi sorkarna hmanrua atan hman an tum lo tih a ni a, an neih loh vang ni kher loin dik an duhna a ni a, thil lawmawm a ni.
Tuna an party hruaitu MLA leh Minister hluite hi an chawlh duak loh chuan chance an nei lo hulhual tih hriain MLA candidate tur hi a zawnin an zawng khawm ruih ruih a, mi thar an awm ṭhuau ang a, kum 5 hnuah chuan chance an nei leh thei ang.
ZPM ve hi sawi thiam harsa, mihring mala chhiar dawna chhiar tur pawh nei lo ber ni chunga MLA ngah ve tlat si an nih avangin neutral hian an la ngaizawng tlat hi an vanneihna a ni. Chuti chung chuan an MLA neih mek hi en ila Mizoram sorkar kaihruai tura han itawm tak ni lem lote an kawl nual a, ZPM hian mithar an mamawh tam ber.
ZPM hruaitu zingah ṭhangthar mithiam an awm rualin zawhte upata upa party lama nihna neih tawh hmanga candidate nih tum an tam chuan an boruak kal mek hi a chawl ṭhap dawn a ni. ZPM chance ṭhatna chu hmingchhiatna an la nei lo hi a ni a, tunah hian huaisen tak leh taima takin candidate tur zawng se chu chuan sorkarna a siam phah tir thei a ni. Nimahselangin he ZPM hian tlakchham pakhat lian tak a neih chu Party Structure nghet a ni. Thingtlang lamah hian a bikin vote thlak dawna party lian an vei vut vuta mipui thlamuantu tur Unit leh Block hruaitu rin tlak an tlem chuan vote thlak dawna zuih thei an ni a, an tih fuh chhoh chuan khawpui wave hmangin sorkarna siam thei an ni.
MNF hian an hriat chian em em chu MLA inthlan hmasak khan an comeback leh theih chhan kha hmel thar (New Face) an neih ṭhat vang a ni. Kum 2008 inthlana mawng sawh dawpa mipuiin an paihte kha mipuiin an duh thar leh vang ni loin Congress zu zuar ning tawh, ZPM la te si nen khan kal ngaihna awm loin vote za tlem te te khan an tling a. An sorkar leh ta a, nimahselangin an performance a ṭha lo a, Chief Minister ber hi a image a ṭha loa Social Media lo chak tawh nen mipuiin an hnawl laklawh tawh chuan insiam ṭhat theih a ni tawh ngai lo. Centrala BJP anga Party President leh Chief Ministerial Candidate hi mi hrang daih an nih theih chuan an la sorkar leh a rinawm a ni.
- K. Lalduhawma