HLAWH LEH PENSION LAK TLAI THIN HI

Mahni inmualpho nge ka nih tuna Mizoram Sorkar mualphona? Kum upat lamah tunah hian Pathian ṭhatna zarah kum 86 lai kan nupain kan lo hmang mek ta a.

Kum a lo tam ṭan ve ta deuh a, hriselna pawh a lo tla hniam hret hret ta a. Doctor kan lo rawn zing telh telh a, damdawi man pawh hi a lo sang chak ta hle bawk nen, khawsakna pangngai bakah inenkhawlna chi hrang hranga enna man te hi kei ni ang rual tan chuan a hautak ta hle mai bawk nen. Pension hi thla tir te ah hian lak theih hi a va chakawm tehlul ve le. Thla tina hetianga tlai regular reng mai hi.

Sorkar hian min vei tawk lo em ni kan harsatna te hi min chhut pui pha ngang lo em ni le! Pathian zarah tu leh fa, naupang an lo awm ve diah diah a. Ka tute hi dorzon khat aia tam leh ka tuchhuan dorzon chanve aia tam Pathianin min pe a. Ka pension pawh kum 22 aia tam a lo ni ta a, khawsak a va lo harsa ṭalh ṭalh ve le. Kei ni aia dinhmun harsa zawkte tan phei chuan hringnun kawng hi a va manganthlak dawn ve, ka la ti lehchhawng rum rum fo mai.

2. Pensioner te chauh ni lo sorkar hnathawk ve si, mi in luah leh fa nei diah te tan lek phei chuan khawsak a va harsa dawn em ka ti fo mai. Khawpuia awmte hian naupang sikul kal nan English Medium School (Private) ah deuh vek kal tir kan duh ṭheuh si a. Kan retheih avangin taksa mamawh ei tur ṭha (nutritive food) hmuh phak loh avangin hrisel a harsa a. Ka hmuh leh hriat chian te hi chu sawi kher lo ila. Nun hi a manganthlak ta deuh chu a ni.

3. Sorkar hian kan mamawh chawpchilh (immediate need) tan hian a sum neih ang ang hi hmang nasa zawk sela. A loa kan la awm theih em em, Hall man tam tak tak a sak te, central sum liau liaua siam theih a nih loh chuan playground siam zel te hi insum deuh thei sela. Kan ngah zawng tak mau hmang ṭangkai si lova, a chi thar chin tum tlat te hi insum hram hram thei se. Sorkar hnathawk D.A pung leh Pensioner D.R pung te hi pe hram hram thei se. Sorkar hnathawk Pension tharin an Pension Gratuity hmuh tur te hi hren beh ngai lovin pek tum hram hram ve se kan va ti em.

A tawp berah chuan Sorkar inrelbawlna lam reng rengah hian inrenchem (thrifty measures) hi ngai pawimawhin rilru ah nei tlat se. Tun ang renga kan kal chuan tuna sorkar tan hi chuan term tharah Mizoram Sorkar hi a tlu chhe lo chauh emaw a ni ang tih a hlauhthawnawm tawh hle a ni. Lalberte lal ber sorkar ni lo, equal collective leadership principle a neih hi i tum hram hram teh ang u.

Pensioner te leh Sorkar hnathawkte hi kan buai zozai ta si a.

- S.Lianhrima Hauhnar M.C.S 1974