Lunglei leh Champhai MLA te chet dan kha...

Kum 2023 kum tawpah kan inthlang leh dawn ta bawk a, MLA te awm dan kan X Ray chho ve ṭan ang. Covid 19 hripui len laia chhim lamin RT-PCR khawl an mamawh lo ti hiala Congress MLA pek a nih vanga khawl hmang ngam lo leh MLA ngawi ṭhapte khan Lunglei mipui aia an hlauh Aizawla an Party hruaitute hi vote zawng turin an koh a ngai ang.

Champhai zawng zawngin kuhva rah an tawlh lo a, smuggler hnuaiah an kun lo tih lan tirin smuggler dodaltu Champhai DC Maria CT Zuali boruakah khan Champhai MLA pahnih chu zawn ngai khawpin an bibo a, kum tawpah vote an zawng ngam dawn em le?

Mipui hian 'Short Memory' an nei tiin an sawi ṭhin. Hemi awmzia nia ka hriat thiam ve dan chu mipui hian thil an hre reng tak tak loa chuvangin 'politician fing' chuan mipui laka bihruk hun a hria a, mipui chuan inthlan dawna pawisa an dawn chuan a hmaa an awm dan dik lo pawh an theihnghilh daih zel an tihna ang chi a ni thei awm e. Mahse mipui hian 'Short Memory' nei pawh ni se Social Media hian thil a hre reng thung a, a video leh thlalak bakah Voice Record a lo nei si a, chuvangin Lunglei leh Champhai MLA te hi X-ray an ni dawn a ni.

Lunglei mi ni mah suh ila Lunglei MLA te ka lo dem vena chu Covid hri len lai khan RT-PCR mamawh lo anga sorkar lamin an sawi khan an ṭang eih lo a, RT-PCR khawl an kawl sa reng pawh kha Congress pek a nih vangin hman loha awm kha an pawi ti reng reng lo. Hman phal lotu kha Aizawl lama MNF hruaitute an nih phei chuan Lunglei kha a tlawmin an tlawm vawng vawng a, chu chu an MLA te tal khan huaisen takin an au chhuah pui ngam tur a ni.

Mipuiten MLA kan mamawh hun chu ralmuanga MLA Fund awm sa sem kual sem kual tur chauh ni lovin harsatna a lo thlen hunah kan aiawha huaisen taka ding tur an ni. Lunglei tana Covid sample test harsatzia leh TrueNat khawl a awm hnu pawha test chak theih si loh, ZMC lama thawn chhung rei bawk si kha hai der ni awm takin MLA zawng zawng khan ngawi ṭhapin an thlir a ni ka ti lo thei lo, an demawm chu kan ti ve lo maw?

Champhai thil thleng kha a danglam kan ti lo thei lo. A chhan chu Champhai DC khan smuggler te kuhva a hal a, kha kha sorkar ber khan a DC kha a sawn ta mai si kha Champhai Thalai rual khan DC sawn kha an duh loa mahse smuggler lam khan DC kha hnawk an ti tlat si niin a lang. Champhai Thalai rualin DC chhuak tur an dang ta kha a nia.

Kha thil kha kan sorkar thil tih a ni a, DC sawn kha sorkar thuchhuah ngei a ni. Champhai MLA te khan huaisen takin, "Smuggler hmaah Champhai kan tlawm lua e, kan sorkar pawhin sut leh rawh se," ti ngam se chu kum 2023 inthlanah pawh huaisen takin an campaign leh ngam tur a nih lai khan Champhai Instagram Page lianah khan, "Champhai District MLA Bo Zawnna" tih kha an rawn post a. Champhai Thalaite khan dik loa hausa an thik loh thu leh smuggler an thik loa dikna an duh zawk thu an aupui a, kawngte an zawh a nih kha. Mahse Champhai District MLA pathum khan an mipuite thlavang pawh an hauh ngam lo a, kha thil kha Champhai mipui chuan an hre reng tawh ang.

MLA inthlan kan nei leh dawn a, mahni bial pawh chhan ngam lo, Aizawla party hruaitute hlau reng renga awm MLA te ang ni lo hi khaw tinin kan mamawh chu a ni.

- Vanlalrema (Marema)