MP ngei reng vs MP Vena

Inthlan a hnai ta deuh a ni ang, rilru ah MLA leh MP ṭha neih duhna a lian tulh tulh.

Tun hma deuh khan MP fel tak tak kan lo nei tawh ṭhin a. Mizoramin MP kan neih ve theih hi member pahnih an ni mai a, vai MP sang dawn zingah Parliament house a thusawi ve tur chuan hun neih a harsa dawn tih pawh a lang reng mai.

Chutih rualin tunah hian Rajya Sabha session-ah Mizoram MP K Vanlalvena'n Uniform Civil Code (UCC) chungchang a zawt a, he a zawhna hi Union Law and Justice minister Kiren Rijiju chuan a chháng. K Vanlalvena chuan, UCC bill chu tuna session neih mekah put luh a nih a rinawm lo tih a sawi a ni.

MP Vena hi tun hmaa kan MP neih tawhte aia a zir sanna emaw a ropui bik viauna a awm hauh lo tih kan hre tlang a, mahse Rajya Sabha session-ah a ding ta fo mai hian Mizoram MP te leh MP la nih tumte hnenah a bikin chona thar pe hram se ka duh hle mai.

Session dangah pawh MP Vena hi a ding fo tawh a, vai MP tam tak zingah thu sawi ve na hun a awm lo Mizoram MP te tan kan tih ṭhin kha a rawn thai chhe chiang viau mai.

Lok Sabha-ah chauh pawh member 500 chuang an awm a, Rajya Sabha 240 chuang an awm leh a, heti zat kara Mizoram MP pahnih chauh tana thu sawi hi thil awlai a ni dawn lo tih a lang reng.

Amaherawhchu, tunah kan MP pakhat zawk K Vanlalvena'n Vai MP khuti zat karah vawi tam thusawina hun a nei thei leh Mizoram tana thu pawimawh tak tak a zu sawi thei ta fo mai hian Mizoram MP te tan thusawina hun ṭha a inhawng ve reng a ni tih a tichiang a.

Uniform Civil Code phei hi chu Mizo hnam tana thil pawimawh tak a ni a, hetiang thu pawimawh central lama chai ngai hi tun hma pawhin kan lo nei fo tawh a, mahse kan MP te kha an ngawi thei viau mai a. Kan MP te thil tih kan lo hriat ve ṭhin chu kan MP ten Parliament house-ah session an zu chhim ve ṭhin tih kha a ni deuh mai awm e.

- Vohbika Pu