Aizawl hian 'Day' aia mamawh a ngah
Aizawl Municipal Corporation chuan mipui chhiah tling khawm aṭanga pawisa awm chu Aizawl Day lawmna atan cheng nuai 60 zet mai an dah a, chu Aizawl Day chu February 25 a ni a kei ni Aizawla piang leh sei lian pawh hian kan lo hriat mumal loh laiin a kum 133-na kan lo hmang dâwn tawh reng a ni a, cheng nuai 60 khawhral kher lo pawhin kan lo läwm tawh niin a lang.
Nuai 60 hi engzât nge in la hriat loh chuan heti zawng hian hrilhfiah ila a chiang ang. MNF sorkar chuan kum li chhungin SEDP atan tiin Rs 25000 an sem thei hram a, kum li chhunga Rs 25000 chu thlà 12 zela kan sem chuan Rs 2083 chauh a ni a, MNF sorkarin a Flagship program a tih meuh SEDP aṭangin kum li chhungin kum tin Rs 2083 a pe thei.
Chutih lai chuan mipui aṭanga chiah tam tak khawntu AMC chuan cheng nuai 60 meuh sengin Aizawl Day a läwm dâwn. Nuai 60 hi Rs 25000 in kan sem chuan chhungkaw 240 a sem daih a ni. Mizorama thingtlang khaw lian ve taka sorkar hnathawk awm lohna chin chhungkua 240 awmna hi chu lian ve tawk tak a ni a, chumi khuain kum li chhung ngawt pawisa an dâwn theih chu Aizawl Day lawmna atan a kal ral dâwn a ni.
Keia mimawl taka lo ngaih ve dan chuan Aizawl Day hmanna tur pual hian Project te an siam ang a, Central aṭanga pawisa lo kal kha an hmang tur angah ka lo ngai a chuti a nih chuan 'Bonus' tihna a ni. Pawisa hrang lâk a nih chuan Aizawl Day lawmna hi ka do hranpa lo, pawisa awmna mipui chhiah an lâk khawm aṭanga nuai 60 an dah hrang a nih chuan i dem ngam ang u.
Kan sorkar hian tourist hip lem lovin International Tourism Mart a lo buatsaih tawh a, chutah chuan sorkar laipui pawisa bakah MNF sorkarin Flagship atana a dah SEDP aṭangin cheng nuai 200 an hmang hem hem tawh. International Tourism Mart kha sorkar laipui program a ni a, Mizoram khan hlep neia lo buaipui awm tak kha SEDP pawisa cheng nuai 200 an han hmang pawp mai a nia, nuai 200 chu a va han tam em ve le.
Aizawl Day hman dan media lama ka lo hmuh ve chu Cosplay leh Carnival tih te, Football Tournament tihte a ni a. Football lah hi kan khel nasa si kan zirlai hian a tuar zo dawn a, chu bakah football hian min chiah hneh a, AMC lehzel chuan lo buaipui ve tawh lo se a ṭha ang. Cosplay tihte pawh hi chhiah pek khawm pawisa hmanna atan chuan a uihawm lam deuh a ni. Chutiangin Stall tihte siam an tum a, Chapchar Kut ni se hetiang tho hian kan hmang leh ang a, Handloom show ang tho a nia, International Tourism Mart leh Aizawl Day hman dan inang reng, SEDP pawisa Rs 200 leh AMC pawisa nuai 60 senna hi a uihawm a ni.
Aizawl mamawh chu Day pui tak ni loin Traffic Jam tih tlem, bawlhhlawh paihna ṭha zawk, in sâ tura rei deuh deuh nghah ngai loa tifel zung zung thei AMC thawktute awm zawk se, Aizawl Day hi pawisa hmuhna tur pawh ni ta se, "AMC chu kan indaih loa kan hna pangngai pawh kan thawk sawt lo a. In sâ tur, lei lai turten min nghak nasa sia Aizawl Day chu midangin lo läwm mai rawh se," an tih zawk tura kan rin laia nuai 60 senga Aizawl Day hman tum hi Aizawl tlangval hian ka thlawp thei lo tlat a ni.
- Lalhmangaiha