Covid-19 sample test result nghak mekte chhuah khap a hun e

Hmanni deuh lawk khan Malsawma's Yard-a Futsal khel zinga mi ZMC Doctor pakhat chuan Covid-19 a lo kai avangin Leitan leh Zuangtui an in lockdown a ngaih phah tawh a, he doctor inkhel hi sample result nghak lai mek a ni. 

Inrinni khan thu dang deuhin min deng leh a, Grand Hotel-a thawk lai pahnih an postitive tih hriat chhuah a nih leh tak avangin veng tam takin harsatna an tawk a, lockdown an ngaih phah leh bawk. 

Heng mite hi thiam loh ka chantir lem lo a, ZMC Doctor pawh kha a swap sample endik fo tawh a ni ngei ang a, a lo negative fo tawh ang tih chu a hriat mai e; a ṭhianten a thlavang an hauhna aṭang pawhin. 

Chutiang bawkin Grand Hotel-a thawkte pawh hi vawi khat aia tam test paltlang tawh an nih thu hriat a ni bawk a, heimi vang hian test leh pawh nise a hmaa an lo nega­tive fo tawh chuan inrinhlehna an nei lo anga, an lengchhuak pawh a hriatthiamawm lutuk e.

Amaherawhchu, tu emaw office kal mai mai hi an swab sample lak a ni ngai lo a, khawlaia veivak mai mai pawh an test ngawt ngai lo. Heng an test tawhte hi chuan hripui hi kai theihna chance an nei tihna a ni a, chumi vanga an swab sample la pawh chu an nih ngei hmel. Chutiang huang chhunga dah theih chu tunah hian mi tam tak an awm a rinawm a, test result nghak mek khawlai lo leng fo mi dang pawh an awm tawh ang a, tuna mite hi chu an vanduai bik a ni mai.

An duh vanga hri kai an ni lo bawk a, dem ngawt chi an ni lo. Chutih lai chuan duh loh hrikai vangin veng leh khaw pum buaina a chhuak thei si a, sorkar lam emaw helam buai­puitu lam emawte hi in ngaihtuah chiang se, swap sample result nghak laite khawlai len phal lohna thupek hi tichhuak se a va ṭha dawn em. Chu chuan mi tam tak buaina tur a pumpelh tir ngeiin a rinawm. 

Sorkarin test-na khawl a kawl nual tawh a, sample test tur pawh a hma angin a tam ta em em lo bawk nen, sample test result pawh a chhuak har tawh lo deuh turah ngai ila, chutiang a nih chuan result nghah lai tal hi chu inkhungna tur dan siam a ṭhain a lang. Tun dinhmunah chauh ni lo, nakin zelah pawh a la ṭangkai hle ang.

Chutiang ni loa sorkarin chhuah a phal lo chung an lo chhuak a nih erawh chuan a ṭha lo hle ang. Hetiang case hi pahnih lai kan nei ta si a, hmalatu turin hma an lak erawh a hun ta hle mai.