Hruaitu lawk ding lo tur?

Kumin chu inthlan kum a ni bawka chanchinbu leh social media lama article hrang hrang pawh politics titi in a khat a ni hawt e.

He kum pawi­mawh­ah hian Mizoram hian kum nga chhunga a chunga roreltu tur a thlang dawn a, Political party lam pawh an fimkhur ngang ni tur a ni, Politician pawimawh ding lo tur nia sawi an awm ta nual mai, thudik leh finfiah theih a ni lo chungin titi khawchang hi inthlan kumah chuan politics kan thlir dan a ni ngai e.

MNF hian an mi pawimawh leh langsar tak tak an din tir lo thluah dawn an tih zingah MP hlui leh MLA hlui Pu Vanlalzawma hming a lang. Pu Zawma hi Mizo pa ṭha leh tlawmngai tak a ni a, Aizawl West 3 MLA ah vote 1000 zeta a chak loh hnuah Serchhip bial bye election-ah ruling candidate ni chungin a mualpho a (A mualpho chhan hi chu ama thiam loh ni loin hektu MLA leh hektirtute mipuiin an duh loh vang a ni). Tun ṭumah hian Hnam Run uap turin an dah bang dawn niin an sawi.

Pu Zawma ding lo turin mipui a barakhaih loh laiin Dr R Lalthangliana hi seat chang lo thei dinhmunah a din tur thu a awm a, ani bakah Pu Lalthlengliana, Pu K Vanlalauva te hi chu chawlh tum tawh niin an sawi a, vangvat kai senior zingah Pu Lalchamliana hian chawlh a duh a, a dang pahnih hian chawlh an la tum lo niin an sawi bawk.

Congress hi MLA 34 aṭanga MLA 5 leka tla an ni. Kum 2023 ah hian tute nge an chawlhtir dawn hriat ni mah suh se, tuna a lan dan chuan Minister hlui zingah Lalrinmawia (2018 ah pawh a chawl tawh), H Rohluna, KS Thanga te chawl tura thuthang a awm a. MLA ni tawh la valai si R Vanlalvena, R Lalrinawma, Lalro­biaka te pawh chawl tura sawi rik an ni.

ZPM hi hrual mum an harsa a ni ang, tute nge ding dawna tu hi nge ding dawn lo tih hi hriat ruk pawh a la har. He party-ah pawh hian an hruaitu lawk zingah MLA ticket nei loa office luah lum tur chi an in dah dawn tih a awm a, chung zingah chuan President Pu Lalliansawta, Vice President Kenneth Chawngliana leh Rev. Dr. K. Thanzauva te bakah an hruaitu langsar ṭhenkhat hi, an ti bawk.

BJP hian Congress hruaitu lawk thlem mek an nei tih titi a awm mek bawk a ni.

- LR Hnamte, Tuikual South