Kan sawrkar hi ENGTIN NGE A AWM ZEL ANG LE?

MNF te hi India laka Zalenna an sual lai khan, Chhim lama an kal chuan, Hmar lamah an kal, lo ti rawh u, ti ṭhinte kha an la ni reng (According to Ex CM Hawla), an sawi loh anga awm ṭhin an nihna a lang leh ṭhin a, a pawi hle.

MNF Party-in mipui an la bum chhunzawm zel thei hi, anmahni tan chuan nuamsingkhaw tih ang ang mai a nih laiin, ram leh mipuiin kan tuar tel tlat erawh a pawi khawp mai, hun a uiawm piahlamah hnungtawlhna nasa tak a tling awm e. Mizo danah nula-in mipa ngai (thuhmun) hnen aṭanga sawn a pai nawn chuan, mipa thiam loh ni tawh lovin, hmeichhe thiam loh a ni tawh a, sawn man ṭhin nawn a thiang tawh lo. Chutiang chiah chu Mizo mipui dinhmun hi a ni. MNF party hian Mizo mipuite sawn min pai nawn tir a ni ber mai. Bum nawnin kan awm miau! Nuai thum sawitu leh traffic jam awm lohna khawpui min tiamtuten eng hmasawnna nge min pek, ngaihtuah chian a va ngai em!

An sawrkar hmasak ṭuma Congress sawrkarin Taxi permit a pek belh ngam loh chu, kan bet rei tawh tih chhuanlam hmangin Taxi permit 5000 zet an han pe a. Kar lovah Aizawl Traffic a jam nghal a, tun thlenga kan buai chhan bul chu, anni hi an ni. Tunah ngei pawh Two Wheeler Taxi permit (Congress pek hnua) an pek zawng zawng hi 3000 chuang a ni leh der tawh. Buaina chhum dum ang mai an ni.

Cheng nuai tel sawi chungin, cheng 25000/- hmangin kan hmuiah chithlum an tat zeuh a, ring fan uak chungin a dang dawn leh hun min nghah tir bawk. Bawng kal ṭha duh lo kaltir nan, a ei phak loha luang no hmanga thlem kal theih ang chauhah min hmu tihna a ni. Cheng nuai thum sem ngei chu an 'target' a la ni reng tih an la sawi a, zah thupna hmai thinghawng hi an tana siam nia mawi a ni!

Congress party sawrkar lai khan CSS hnuaia hnathawkte khan hlawh an la thei lo fo a. Khatih lai khan MNF party Senior Vice President Dr R Lal­thangliana chuan, MNF kan sawrkar hunah chuan sawrkar hnathawk hlawh lak theih loh a awm ve dawn lova, CSS hnuaia Hindi Teacher te pawh dah ngheh kan tum ang a, Sikul zirtirtu indaihloh a awm tawh lovang tiin a sawi a nih kha.

An thusawi leh a tak chu a inpersan hle. Hun rei tak sawrkar hnathawk leh pensoner ten, a hunbi-ah hlawh an la thei tawh lo. A changin an pûk sak rawl nen! Hetih rual hian, sawrkar hnathawkte'n an hlawh aṭanga GPF an dah te chuan mu leh mal a nei tawh lova, kan sawrkar hian felfai taka lo enkawl mai tur a nih rualin Chawhchawrawih bawmah a thin pawlh vek a, mahni pawisa dah pawh khawih chet theih rual a ni ta lo. Tun sawrkar hian, thla thar kan tih ṭhin kha ni 10 hnu lamah a sawn a nih tak ber hi!

The Frontier Despatch zirchianna aṭanga a landan chuan, Mizoram sawrkar hnathawkte hi thlatin mi 1500 chuang an pension ziah a, hnathawktu lak thar erawh (sum harsat vangin) a awm meuh thung lo. Congress sawrkar tawp dawn lam khan Mizoram Police boral an ṭhahnem hle a, post ruak pawh 1000 chuang a awm a ni awm e. He thil hi MNF PR chuan sawrkar zu zawrh vanga boral angin an sawi a, thui tak chu a dik tho maithei bawk e. Heng Police boral chhungte hi Compasonate ground a (an aiawh) lak tur niawm takin, hmun hrang hrangah an party Unit mite an vah kual tir a. An sawrkar chhunga ti duh chiah si lovin NLUP an sem ang deuh tho khan, politics ai-awt ni turin an khek khal leh bawk. Bumtu ve ve mizia chu hetiang hi a ni tiin duhtawk ila, lo ngaihtuah chhunzawm tawh mai teh u.

Tunah hian Mizoram sawrkar deptt tinah hian hnathawktu an tlem ta hle a, indaih a ram an awm ta lo. Police deptt chauh sawi ta ila, tunah hian Post ruak 4000 chuang a awm mek a, heng post ruak hnawh khahna tur hian sawrkarin ke a pen thei chuang lo a nih hmel.

Sikul Education deptt khan inchhuang takin Kumin Sikul kumthar aṭang khan, sawrkar sikulin ngaih hlut a hlawh thar a, enrollment a pung nasa hle an ti. He thuah hian, sawrkarin SEDP sum hmanga sikul zirtirtu mi 700 chuang a lak thar vang leh sawrkar sikula Sapṭawng uar a nih dawn vanga hípna thar nei ta ang hial leh Minister fakna pawh hmuh tur a tam hle.

Hetiang a nih lai hian, thil awmzia chu hetiang hi a nih hmel zawk. Covid hrileng vanga chhungkaw tam takin, an fate English Medium Sikula an dah theih tak loh vangin sawrkar sikul enrollment hi tlem chuan a pun phah ngei mai. Hei bakah hian kan ram ṭhenawm Myanmar buaina avanga kan unau raltlante'n an remchan ang zelin an awmna khaw tinah zirna an chhunzawm ve bawk. He thuah hian figure dik tak sawi theih ni lo mahse, kan unau raltlan, Mizorama inbengbel zingah hian, naupang 6000 chuang zet ten kan state Education hi chhimin, Mizoram sawrkar chuan, free Education, Free Uniform & Text book bakah Mid-Day Meal thlengin engkim a pe mek tih Education Minister Pu Lalchhamdama Ralte chuan a sawi a ni.

He thu hi, tunhnaia USA lama khuallian a tana sawm (Assembly Session ṭhulh ṭhak khawpa zin) chuan inchhuang leh nuam ti takin (Myanmar Mizo kalkhawm etc te) bulah a sawi a, kut pawh an beng ring hle a nih kha.

Tichuan, kan sawrkar sikula enrollment lo pun chhan dik tak chu, buichhia laih lohin a inpuang tih ang vel a nih tak chu! Sikul engemawzat a zirtirtu kan biak te chuan, Myanmar aṭanga zirna rawn zawmtute hi an ram hrehawm ṭhin vang nge, an chhelin an thawkrim hle a, class tam zawkah hian a thiam ber berte an ni tlangpui tih an la sawi cheu bawk.

- Vanlalhuma Kawlni