Basketball Inkhawmpui lian ber - MSL 8 Kan thleng ta
"MSL-8 chu a phurawm tawh khawp mai. Player-te an fit ṭhat bakah an inbuatsaih uluk hle tih ka hria. Hmuhnawm chho hle turah ka ngai. Kei hi MSL 7 leh 8 inkarah INBL leh Thailand-ah 3x3 ka khel a, experience tam tak ka neih belh hi hlu ka ti hle. Ka teammate-te ṭum dang zawng aiin an phur a, an thawkrim bawk. Champion leh ngei turin theihtawp kan chhuah ang" tih sawitu Lalrina Renthlei hi MSL ṭum nga champion team-ah a zawn zatin a tel tawh a, ṭum thum lai player hlu ber (MVP) a ni tawh bawk - MSL lama a mimal record siam tawh chhinchhiahtlak tak tak te hre reng chungin khi a thusawi hmang khian MSL 8 kawngkapui in han kik hawng teh ang.
MBBA leh Zonet ṭangkawpin MSL a duang chhuak hi chu a fuh thlawt a ni. R. Dengṭhuama Hall enkawltuin a enkawl hall-ah hian, "MSL tluka mipui hip khawm tam a awm ngai lo" tih a sawi hian MSL nihna a phochhuak chiang hle. Nikum MSL 7 final game 3 chhimtute khan he thu hi an ṭawmpui chiang fu ang - hall chhunga enna chang lo, pawn lama mipui tlim hmur tamzia leh lirthei inzui kawi nguah nguahte kha 'a mak a mak a tam' dik tak zawk a ni!
MSL 8 buaipuitu lam hian final thlir lawk se, hall chhunga leng lo tan pawnah 'big screen' chhawpchhuak thei se a duhawm ngawt mai.
MSL ṭum 7 neih zawh takah khan Zarkawt BCA in a hnuhnung inelna 4-a champion trophy kha an hui fai vek a. Hei tak hi ṭum hnih champion tawh TBL tân ṭan a va nat zual phahin, a va'n tlawm thlak dâwn em - anni lam hi an inbuatsaihna chhehvel leh an foreign player lak thar ngaihtuahin, MSL 8 nomawi hi Khatla lamah hawn an tum dâwn, tum mai ni lovin an hawn ngei hi an beisei tlat sa.
Chanmari Vikings hian MSL chawi tawh an nih kha an theihnghilh hauh lovang le - experience player Chpa leh a teammate-te hian Vikings club hi team naran ni turin MSL 8-ah hian an rawn inlanpui lo tawp ang - championship trophy hi Chanmari kawnah an châipui dâwn chuan an head coach El-a hovin an thahrui leh thluak an sawr fu ve fê chu a ngai ang.
Club chawrno leh ṭhangduang zet Mission Veng Hot Shot hian MSL an hmachhawn hma sak ber nikum khan semi final an thleng nghal! Club neitu lam Pu Amuana leh a thawhpuite hian MSL 8 hi an foreign player lak luh dan aṭang hian hawn an tum tih a chiang e - anni hi MSL hnuhnung bera club boruak nei hot ber, inthurual leh phur ber ti ila, hnialtu an tam lovang!
The general Dina hovin Tuikual South hian an tih theih leh an thlen theih chin basketball ngaina chuan kan hre vek awm e - inlungrual taka "Phengphehlep ṭial mawi te...." tia Tuikual an hrut del del a, an hlapui nen veng mipui an rawn tleh chhuah leh hum hum chuan eng game-ah pawh hian an chak leh mai zel.
Mizoram basketball chawi nungtu veng hi fans nei ṭha lawr lak thei reng an ni a, an general chawlh hma hian MSL 8 table chung bera awm chunga an veng lam pana final zana an haw tur han mitthla chhin teh u - a va'n bawn dâwn tak. Anni veng hi neutral fans chuan 'champion se' an ti ber - an phu a, atchilh ngam tam hek le!
MSL 8-ah hian hmel thar club ṭhangduang tak tak pathum ṭhawt kan hmu dâwn bawk. LB Associate, Bungkawn hian tunhnaia Mizoram Sr. Team, North East Zone-a ṭum hnih a zawna champion-puitu an head coach Kca tawnhriat ringawt pawh hi pakhatna nia a hmawrbawk nana tlak leh tham, barakhaihtu ni thei an nei tlat, sawi lawk theih an ni lo.
Khatla derby a lo irhchhuah theihna turin Barons an rawn inlar a - thawm ring satliah leh team vantlang ve lek mai an ni lo tih chu tunhnaia an club result hi bih zeuh teh le...
Khi lamah, khawchhak lam aṭang khian Champhai in basketball an rawn lum e - Aizawl hian mikhual tlangnel satliah thlenin a lo thleng tawp lovang. Hmun hma ṭha neitu hian hnu hma ṭha tak hnutchhiaha an rawn chhuahsan tak Champhaiah, he Aizawl club 7 in an inchuh MSL champion trophy hi an hawn daih thei tlat!
MSL champion ngun ber BCA a an club manager Zarkawt pa, a club-in zah taka a jersey number tuma hak ngai tawh loh tura an chawlh tir tak, Lalsawma chuan inngaitlawm takin, "ṭum nga law law (5'peat) a zawna tuma ban phak tawh loh tura MSL 8 trophy hawn te chu a chakawm lutuk. Mahse, Pathian rorel dan kan hre phak lo va, club tin an thawkrimin champion thei vek kan ni a, hei hi MSL 8 danglamna tur leh a hmuhnawmna bîk tur a ni!" tiin a thlirlawkna a sawi hi club tinte dinhmun chu a ni.
Match official Kanan val Puitea leh a thawhpuite kutah MSL 8 chu kan hlan e - MSL awm tawha ngaihven hlawh ber tur hi a hmunah en ve sak ila.
- Ṭpa Bunghai