Sorkar sum renchem turin Sorkar hnathawk tan MR Contributory Scheme

Sorkar hnathawkte hian an hlawh bakah hian hamṭhatna dang an ngah khawp mai a, a lal apiangin an ngah leh zual. Mahni ina peon 2/3 kawl thei hial te pawh an awm an ti.

An hamṭhatna dawn ṭhin zinga Sorkarin sum a sen tamna em em chu an dam loh nikhuaa an inenkawlna an bill leh theihna, medical reimbursement (MR) hi a ni a. Tun hnaiah Sorkar han strict tharin bill theih chinte pawh han tihniam deuh mah se MR bill hi Sorkar sum a luan ralna lian tak pakhat a la ni reng tho a ni.

Sorkarin sum indaih lohna nasa tak tawk lo se chuan danin a phalsak chin ang hi chu bill thei zel se an duhsakawm viau mai a. Chutih rualin kum tin mai cheng vaibelchhe 70 bawr dah ziah a ngaih vangin state rethei tan chuan phurrit a tling tak meuh meuh si a. Chuvang chuan, kawng dang kan zawn a ṭul hle a ni.

Heti hian ti ta se la: Mipuiin Health Care kan neiha kan sum thawh tam dan azira bill theih chin a inang lo ang hian Sorkar hnathawkte hian an inhuam dan ang zelin thla tin an hlawh aṭanga cut turin sorkar hnathawk MR contribution hi pe ve ta se la. A pe tamin an bill theih sang ve zel mai se la. An bill loh kumah chuan mi dang bill mamawhten an vanneihpui a ni ve mai ang a. Bill an mamawh kumah an vanneihpui ve leh mai ang a.

Entirnan, kum khata cheng sing 5 thleng bill duh chuan thla tin a hlawh atangin cheng 300 cut tir se la. Chutiangin cheng nuai 1 bill duh tan cheng 500 cut; cheng nuai 1.5 bill duh tan cheng 800 cut; cheng nuai 2 bill duh tan cheng 1000 cut; cheng nuai 2 chung lam bill duh tan cheng 1500 cut. "Ka bill ve duh dawn chuang lo" ti an awm leh cut loh a ni mai a. Bill an duh thut vanga pek chawp phal ni lo se la.

Sorkar kum thar, April-a an pek dan ang zelin kha financial year-ah kha chuan an bill theih chin bituk ni se la. Kum laklawha tihsan thut emaw, tihhniam thut emaw kha phal loh ni se a ṭha awm e. A tira pe tam hreh si, bill tam duh vanga an mamawh dawn thlaa pek tam thut tum ang chi a veng dawn a ni.

Hetianga sorkar a kal chuan kum khata cheng vaibelchhe 70 bawr MR bill atana kal ṭhin hi nasa takin a tlahniam ang a. Sorkar hnathawkte thawh khawm hian an MR bill belh khawm chu a la pha lo maithei a. Mahse, nasa takin cheng vaibelchhe 70 aṭang hi chuan a tlakhniam phah ang a. Chu sum kan save chu hmasawnna hnathawhna dang atan a hman theih dawn a ni.

Kaihhnawih tam tak chu a nei ngei ang a. A harsat theihna lai pawh a awm ang. Mahse, thil hi kan tum leh tum loh azir zel a ni.

- C. Lalthazuala, Champhai