Aizawl Day leh huau huau sorkar

Aizawl Municipal Corporation (AMC) chuan Aizawl Day vawi 133-na lawmna lo awm tur chungchanga chan­chinbumite an kawm thuchhuah kha Social Media lamah ka lo chhiar ve a.

AMC in cheng nuai 60 an theh chhuahna tur en hian khawpui hmasawnna atana pawisa nei lo inti tan chuan thil zahthlak niin ka hria a, Covid-19 avanga pawisa nei lo inti em em chunga Mizoram sorkarin huau huau hrang hrang buatsaih a ṭhulh miah chung lote nen hian tum thuhmun niin ka ngai.

Heti reng renga huau huau sorkar mipui suma kan kalpui a nih chuan mawng sawh dawpa tlak hmasak state sorkar leh Aizawl enkawltu sorkar kan nei tihna a ni dawn a ni.

Lammuala Aizawl Day lawm tum dan hi han bihchiang ta ila. February 23-25 chhungin Lammualah Stall 77 hawn an tum an ti a, an ziah dan chuan chung zinga stall 27 chu ei leh in lam a ni dawn a, Indian, Chinese, Korean, Japanese, Thai, Continental leh Mizo traditional food leh kan chhehvel northeast food a kim vek dawn an ti.

Mipui pawisaa sumdawngte sumdawn­na hmun siamsaka Aizawl khawpuia hmasawnna tur tam tak thawk si lo hi thil ṭha ber a ni dawn em ni?

Food Festival tiin a buatsaih awm deuhin lo buatsaih ta zawk se, tourist hipna ni bawk si lo, a hnu lawkah Chapchar Kut a awm leh dawn nen Aizawl Day tiha hnam dang chaw hrang hrang zawrhna siam hi tu ngaihtuah chhuah tak ni ang maw? tiin ka ngaihtuah ta a ni.

An tarlan dan kan thlir chuan, Stall ah hian Mizo hnam ziarang ti lang thei lam thuamhnaw te phochhuah a ni dawn a a, Photo Exhibition a awm dawn bawk a, hengte hi chu Chapchar Kut lama kum tin kan hmuh ṭhin tlema tih danglam hret a nih hmel a, Aizawl hian mamawh dang a neih tam nen sorkar sum tam tak senga huau huau siama in koh khawm luih luih hi i sim tawh teh ang u.

Costume Parade a awm dawn a, Band Contest a awm dawn a, Lawmman pakhatnain ₹ 1,00,000/- a dawng dawn a, 2-na in ₹ 70,000/- leh 3-na in ₹ 50,000/- an dawng dawn a ni. Band contest a tel tur te chuan AMC Ward chhungah vote an nei ngei tur a ni tih a la ni leh ta zel a, music promote tumna nge Aizawl leh Aizawl lo inthliarna tih te pawh ngaihtuah zui theih tak a ni. Sorkar sum senna atan chuan hei aia ṭangkai hi a awm ngei awm si a.

AMC hian Carnival leh Cosplay sub committee pawh an din rup a, kan khawpuia tui luankawrte chu a la chhe em em a, kan khawpui a la balin parking a la mumal lo zel a, AMC permit lak ngai thil tam tak chu a khirhkhan em em a, thil tenau te te kan tihah pawh fee leh tax hrang hrang a awm tawh lai hian kan sum thawh khawm hmanna hi huau huau siamna a ni si a, hei hi chu ngaihtuah nawn leh a ṭha a ni.

Kum 2022 tawp lama Aizawla sorkar suma huau huau kan hman dan te, tuna AMC sum hmanga kan thil tih tumte hi ram hmasawnna keng tel miah lo, tourist pawh hip chuang si lo sum khawhralna ni theia hriat avangin ngawih bopui theih a ni tawh lo.

Huau huau hian kan zirna a tichhe hneh tawh a, AMC hminga football inelna tihte hi a tiha tih loh tur a ni a, kan kal dan hi mipui tam tak hmaa din chhuah chakna hrin chhuah, ṭhalai punkhawm tir hmanga vote zawn tumna a nih phei chuan vote a hui tam dawn lo a, ngaihtuah nawna ṭhulh leh chi zawk a ni.

- K Lalhmachhuana