KA PHUAH CHAWP A NIH KHA....

Phuah chawp thu puarpawleng hmang bawkin mipui bum leh kan tum em? Manifesto-te chu kan inphuah ṭhatsiak mai mai alawm kan la ti zel dawn nge?

Cheng nuai sawmthum senga cheng nuai za hlawh chhuah tumna politics kan la khel zel dawn em? Kan ram riangte truck ruak economy dinhmuna ding hian chhantu a ngai asin.

Lei theih mipuiho hi: Khua a rawn vawt a, blanket leh shawl sem a hluar leh ṭan ringawt a ni awm asin. Veng leh khaw mamawh hmanga candidate-te lo biak tlawn pawh hi kan la uar zel dawn em? Vote hmuh nan JCB engzat nge che chhuak leh ang? Party sum ngah hmachhuana tlin inrinna thlarauin min la bual â tlat bawk si. Lei theih mipui nia min hmu tlat ṭhin Politician-te hi, ram hmangaihtu tak tak an ni em tihte hi ngaihtuahna fim tak nen, mipuite hian kan ngaituah chian a hun ta hle mai.

Phuah chawp mani­festo: A tak ram theng zo lo, hmasawnna tur ni awm taka lang, thawh rimna kawng bo a mipui min hruaitu, manifesto ṭha tak tak duang chhuak kan politician-te hruai velin, kum 30 chuang chu he ram hian ke a lo pen tawh a. A rei tawh mah mah chu a ni.

Israel ram aia a let sawma ram ṭha kan nei ti zuah zuah si hian, kan ram ṭha chuan thawh chhuah a la nei tlem em em mai si a. Lakhuihthei motor trip hnih lek thawn chhuakin, kan hotu liante kan han vai liamtir vel te kha a ni a, manifesto ropui tak hrin chhuah chu a la nep the the asin.

Lei rem rap lo: 'Kut hna­thawktuten lei rem an rah ve theih nan.' He thu hi kan politician-te au hla ber a ni, lei rem sa hi min rah tleu tir zawk emaw tih mai tur hian, Oil Palm te, Rubber te, Citronella te leh thil dang tam tak min chintir tawh, sa ṭah chhuak pek kan inhlui hi a ni ber mai.

Israel ram ro, tui lak chawp ngaiah, intodelhna khawp thlai an thar chhuah hum hum laiin, ruah tui khawlna neih ṭhat chuan, kum khat tla tur ruahtui dawnna ramah hian, thar chhuah hum hum chu sawi loh. Vai alu, Vai purun, Vai dal, Vai tel ringin, lei rem lo kan la rap ngat ngat mai si a. Zoram khaw var hun nghakin eng chen nge mit kan siai zel dawn le?

Phuah chawpa bawl theih: Phuah chawp mai maia bawl theih mipui nih hi zah nachang kan hre ve tawh em? New Zealand-ah te chuan kawng zawng zawng kan siam zo tawh, an tih laiin, New Zealand of the East-te chu mumang ram, phuah chawp ram mai mai bawk a la ni si a. Kawng chhawngte lah chu zingkara kawh kual aia thui kan la thleng bawk si lo.

Cheng nuai thum semte pawh phuah chawpah a chang leh ta mai bawk si a. Aw Zoram harh la harh lul teh, phuah chawp mai maia ram kalsiam kawng tluangpui hi zawh a hun tawh lo.

- Lalrinliana Coleny