Hlawh lak theih loh laia SEDP sem hi A va han inhmeh lo lulai ve

Mizorama sorkar hnathawkten hlawh a hunah an lak theih loh lai hian sorkar chuan pawisa sem tur a nei leh lawi si a, sorkar hian sum a enkawl thiam lo hle tih phat rual a ni lo e. Sorkar hnathawkte chanai chhuhsaka mipui hnena vote zawnna tura sem a ni mai lo em ni? tih hi zawhna awm thei a ni.

Sorkar hnathawk hlawh lak tlai nghawng hre duh chuan Aizawl bazar te, Lunglei bazar te leh khawpui hrang hranga dawrkai te hi zawt se an sawi thei ang. A hunah pawisa a awm lova, ba thlauin thil a kal tam si a, mipuiin an tuar khawp mai. A bik takin sumdawngten an tuar na zual a, cash flow ṭha lo hian state pum economy hi nasa takin a nghawng mek a ni.

A kal zel dan hi han chhui ta ila thil pawi tak lo lang ta nawlh mai chu Loan latute tana harsatna a thlen thu hi a ni. Loan latute hian a hunah an rul thei hlawm lo a, chu chuan loan pung a tisang ta chiam a, a buai thui ta viau mai a ni.

Nghawng dang a neih leh bawk chu in luah man leh dawr luah man thla tir lama pek ngei ngei ngai ṭhin mi tam tak an awm a, heng mite pawh hi an mangang em em a ni. Chutiang khawpa mipui tana harsatna thlentu sum awm loh laia vote zawnna tura din chhuah pui tham miah lo Rs 25,000 han sem ringawt mai hi chu ram hmangaih vang ni loin inthlan tin zawn rana pawisa sem liau liau a ni.

Amah CM ngei pawhin tuna an pawisa sem hi dinchhuah pui tham a nih loh thu kha a sawi chhuak hial kha a ni a, ram tana ṭha tur ngaihtuah vang chu a ni lo tih a lang chiang a ni.

He thil kal zel hi chhui ta ila. SEDP pawisa hi MNF pawisa a ni lo a, sorkar pawisa mipui chhiah tling khawm kal zel aṭanga sem a nihlai hian an semna mi leh sa hi en ila chiang taka sawi ngam chu MNF deuh hlir an pe ta si a ni.

Sorkar pawisa hmangin party an vulh a, hei hi chu an lo ti duh a nih pawhin an tih duh tawk a nia an sorkar chhung chu an thu a ni hrih miau si a, mahsela a aia nghawng lian zawk leh thil pawi zawk ta em em mai chu sorkar hnathawk hlawh pawh pe hlei­thei loa kan buai ta te hi a pawi a nih hi.

Kan hmabak tur hi a hmuh lawk theih deuh ruak mai. Pawl hrang hrangin nawrh an han huaihawt leh bawk ang a, tun hmaa kan hriat ngai pawh ni lo Open Market Borrowing aṭanga pawisa dawng puk ṭeuh chunga thil sem hi mi in hnuai luah kaawsak harsa tak ni chunga mi pawisa puk chawpa khawtlang tana ruai siam ang lek a ni lo maw? Lo ngaihtuah ve mah teh le.

- Vanlalzawna