Valentine’s Day Pualin 'Thisen Hlu'

Ni 14.02.2023: “Inhmangaihte Ni” hi engtin nge kan hman dâwn le? Hmangaih nei tawh phawt chuan kan hmangaihte tân, ‘a ṭha ber’ pêk kan duh vek ang. Chutiang zêlin hmangaih pawhin hmangaihtu hmangaihna a chhâng let ve ngei ang chu...

Mihring hi in mamawh tawn, a huhova khawsa tûra Siamtu duan kan ni. Chutiang chuan hmangaihnain mipa leh hmeichhia pum khatah min siam ta ṭhîn a nih hi. In mamawhna nei lo, mahnia ding thei ve ve chu ni ila, pum khata siam kan ngai lovang.

Mizo thu lár, “Lungpui pawh lungtein a kamkî loh chuan a awm thei lo,” tih hian hringnun hi a hrilhfiah chiang hle. Mi dang mamawhna nei meuh lova kan inhria a nih chuan leilung dân hi kan bosal hle tawh tihna a ni ang.

Harsatna inpui tlâng a, inphuhrûk a, mi dangte tâna malsâwmna nih hi Siamtu lâwm zâwng a ni. Mi dangte tâna thil ṭha tih hi mahni tâna hna ṭha thawk nihna a ni; mi dang mamawhtu vek kan ni si a!

Kan entawn tûrin Isua’n amah ngei a rawn pholang a. Kristian kan nih ang pawhin kan entawn ber a ni tûr a ni. Hmangaihna avângin a thisen hlu tak a luang a. Misual boral tûr, chatuana hrem hmabâkte min tlan chhuak a. Tihdama awmin nunna kan lo nei ve leh thei ta.

Engkim hi hma­ngaihna vâng chauh a ni e! A hniaka kan zui ve theihna kawng pakhat chu nun thlahlel ngawih ngawih, an taksa chakna, hrisêlna leh an thisen neih­in nunna a pêk zawh tawh lohte chhan­chhuah hi a ni ve dâwn lo’m ni?

I hmangaih tâna thil hlu leh lâwmawm tak hriatreng tlâk i tih mêk lai khân, mahni khum laizâwla thih leh dam sual mêk, hmangaihtu mamawh êm êm an va tam si em!

Thisen hi Chung­nungbera kut chhuak khawvêl thiamna sâng leh ropui tak tak te pawhin a siam ve theih loh a ni. Chu lo liama hlu hmanga mi dangte tâna thil ṭha tih duh lo tu nge awm thei ang le? Hmangaihna bawk a ngai a nih chu...

Lainata hma­ngaihtu hmêl hmuh beisei a, an mit la meng hrâm hrâmte tâna hmangaihna dik pêk chu hmangaihtu leh hmangaihte tâna thil ṭha tihna remchâng a va ni dâwn tehlul em!

Kan hmangaih leh min hmangaihtu pawh chu tu pawh lo ni sela, chu hmangaihna zâwka chu a mamawhtute tân malsâwmnaah kan chantîr ve thei dâwn lo’m ni?

Thisen pein, mi dangte tân mal­sâwmna nih i tum ṭheuh ang u. Hei hi Valentine’s Day hman dân duhawm ber lo ni zêl teh se.

- H. Lalroluahpuia