"MNF 'CHANCE' A LA ṬHA BER" TIH KHA
Vanglaini ni tin chanchinbu February ni 9, 2023 chhuaka Editorial hnuaia Mizoram Assembly Inthlanpui lo awm turah Pu Lalthanzama article ziak 'MNF chance a la ṭha ber' tih kha uluk takin ka lo chhiar a, a thu behchhante nen tuihnih ve teh ang. A hmasa berin a ziaktu Pu Lalthanzama hi a veng leh khua hre lo mah ila, MNF chaktir ring tak anga lan tum a ang hle mai.
Pu Lalthanzama hian a mimal ngaihdan nghet tak a pholnaah hian MNF MLA leh Minister-te chu ruihhlo laka fihlim deuh vek an nihna te, Master Degree an neihte leh Kohhran Upa an nihnate a dah sang hle a ni. Hetih mêk lai hian MNF Minister leh MLA zingah hian tlai lam luhai neih ching ve fu fute leh 1:45 vanga mite nuih tet tette pawh an awm ve nêl nual a, sawi fo ṭul lo mahse mipuiin kan hre hneh fû awm e.
MNF sorkar lehna 'chance' ṭhatna sawi vâwng hle mah se, ZPM leh BJP te ṭan theih leh theih lohah a innghah thu a ziak a. Party dang dinhmuna innghat ringawt Party hian Sorkarna an siam mawh khawp mai a, mahni Party chakna avanga inkhaichhuak thei tur khawp nih a ngai ṭhin.
National Party chak tak, BJP hian seat 3 tal lak tumin an bei nasa dawn a, Congress leh ZPM hian ram pumah candidate nei turin ngai bawk ila. Party pahnih hian mipui ngaihzawn tur leh mi ṭha tak tak an rîm mêk a, an dinhmun tur hi thla hnih khatah a lang chiang chauhin a rinawm.
Congress party dinhmun a hma aia sang chuang lo tura a dah ngawt hi a hmu sual viau thei. Party nghet 'Grand old party' Congress-te ang hi chu hisap thiam an har a, an sorkar loh ṭum pawhin mipui nawlpui vote an dawn hi a tam thei viau tih hriat a ṭha tel ang.
Tun dinhmunah hian MLA bial 40 awmah MLA 5 an nei a, an President thar Pu Lalsawta, Ex-Finance Minister kaihhruaina hnuaiah bial 35 dang viltu tur an ruahman mêk a, an inhûn fel meuh chuan an boruak hi a dang daih turah ngai ang.
Hetih mêk lai hian ZPM hi la sorkar ve lo anga inzuar ni mah se, an mi leh sa hi ZNP, PC leh Party danga tal hrep tawhte an nih nawk avangin mipui hian rinna tak tak an la nei ngam bik chuang lovin a lang a. 'Leadership' lamah hnawk awm renga an la inkhaidiat fuh theih loh avang hian, kum 2018 ai khan hma an sawn lo thei bawk. Anni pawh hian candidate an siam fel meuh chuan boruak danglam tak an la nei thei thung.
MNF hi Pu Lalthanzama'n a hmuh fuh loh chu; Sum enkawlah an hlawhchham a, Sorkar hnathawk enkawlah an hlawhchham a, an 'flagship programme'-ah an hlawhchham a, Vai contractor an nihlawh a, 'Smuggling' lamah an lâr hle bawk. Hei mai hi a ni lo a, an hun rei lo tê chhungin ram leh hnam a him lo a, dan leh hrâi inkaihhruaina a mumal lo bawk. Hotu lû ber aṭangin sum leh pai duhâmnaah an hmelhem hle a, sual tinreng bul duhâmna a lâr hle a ni. Hengte hi sorkar ṭha tehnaa a chhe ber kawktu 'mipui tawrhna' vek a tling awm asin!
Ngun taka ngaihtuah chuan tun MNF Sorkar kum 2018 aṭanga 2023 chhung hi Mizoramin State a nih hnua enkawltu a neih ṭhat loh ber ṭum ni te pawhin a ngaih theih. A pawi khawp mai, thimah min hruailût nite pawhin ngai tawk an awm lai hian; 'chance' kan neihtir leh a nih chuan kan chan tawk an ni tihna a ni ang.
- Lalawmpuii Fanai,
Luangmual