Kan hruaitute kan lo thlir che u

Mizoram Legis­lative Assembly Budget Session-a kan MLA te kan lo thlir ve reng che u a. Kan beisei aia ṭha MLA kan neih theih rualin kan beisei phak lo leh tunlai ṭawnga MLA che nawi tak tak te pawh in hmuh theih reng avangin ṭan la turin Kotlang A Team in kan fuih ve a che u.

Kan MLA zingah ṭawngkam hriam tak tak leh mi hnuai chhiah lek leka thil sawi ching kan hmuh hian en an hrehawm ngawih ngawih a ni.

Mahni Depart­ment chan miin an sawia an hre sual hret a nih pawha hawihhawmna lantir lem loa in deusawh ching mi kan hmù tawh.

Opposition nih avanga thil sawi pawha ki säng leh mi khei rana thusawi kher tum chi kan nei tih kan hmù bawk.

MLA ve si thil hre lo hulhual nih hreha sawi tur pawh hre lem lo kan hmù bawk a, MLA ni zel ta se ramin hma a sawn pui lem loh tur chi an ni.

MLA zingah lehkha thiam säng ber ber pawhin a rem leh rem lova Chief Minister an han fak chiam mai hmuh khan kan ram hmalam hun hi a ngaihtuahawm a ni.

Dik takin han sawi ta ila pawisa enkawl kawnga che chhe tak, mahni hnathawkte hlawh pawh a huna pe chhuak thei ngai miah lo Chief Minister kan nei a. Chutihlaiin a hnuaia Department ṭhenkhatah lah chuan pawisa a pe thei tho bawk si a.

Sorkar laipui project hrang hrang pawh thawk se State Matching Share neih ve a ngai a, chu chu an pek theih reng tho laiin hlawh a hunah a pe thei lo a "Sum ah kan harsa" a ti daih a. Chutiang Chief Minister chh rem leh rem lova fak char char turin em ni Professor, Engineer, Doctor leh PhD kha an zir le!? An zir sanna kha an MLA nihnaah a lang lova, MLA seat chan leh mial beiseina vang ringawta Chief Minister faktute kha hmuh a hrehawm a ni.

MLA hna pakhat kan tih theih chu Session chhunga thu in chuh a ni a, mahse ṭan lam sawi mawi in a lehlam an hnial a. Hetiang debate hian thil ṭha a rawn hring a, ram hmasawnna atan a ṭha a, thil a balance tawn ṭhin a nih laia thu awmze nei fumfe pawh sawi thiam mang lo MLA an awm nual a ni.

MLA zingah hian thu chai lai subject man phak lo lutuk pawh an awm a ni. MLA nih chuan thu kal lam haw lam hrethiam tura inzir ve a ngai a nia. Tlin tawh hnu pawha inzir var lo MLA hi kan nei nual a, lehkha thiam säng hi MLA ṭha an ni kher lo tih pawh finfiah a ni zel a ni.

- Lalrammawia