Thiltithei fal bikin midang a tina ṭhin

Sports Minister Pu Robert Romawia Royte hmalakna hrang hrang fakna turin Private Resolution chu Pu Zothantluanga, MLA in Assembly Session ah a pu lut a, hna a lo thawk tam leh thawk chak lutuk hi a lawmawm em em lai hian, Minister dang tan ngaihthlak a hrehawm thei a ni. Congress hun lai khan Pu Zodintluanga'n hna a thawh ṭhat leh duat a hlawh kha Pu R Lalzirliana te tan khan a lo na hle a ni a, chumi kal zel leh chhan dangte avangin Congress a phel phah tawh a, MNF hi kum 2023 inthlan hma hian a phel a nih pawhin thil mak a ni lo va, in lo chhinchhiah reng dawn a nia, ṭhiante u.

Ziaka kan lo hmuh dan Assembly Budget Session 2023-a Mizoram State Sports Council (MSSC) hnuaiah sports ruhrel (Infrastructure) din nan vaibelchhe 554.04 hman a ni. PMJVK hnuai, Khello India hnuai, NEC hnuai, SASCE hnuai aṭangin hna tam tak an hmu a, heng hi a hmuh tawh bakah Chief Minister pek theih SEDP aṭangin cheng nuai 625.00 man pawh hna an thawk a, SEDP aṭang hian a chang ṭha pawl an la ni phak.

Hnathawktute hi mi hrang hrang an ni chungin a thawk tamte chu Creative Minds, Chanmari, M/s DJ Consultancy Services, Mission Veng, M/s Junior Consultancy Services, Tlangnuam, M/s Zothan Consultancy Services, Luangmual, M/s Décor India, Guwahati, M/s Edufice Infra Services, New Delhi, M/s Consortium, Chawnpui, Mizoram Development Agency, Mission Veng te an ni tih media hrang hrangah kan lo hmu leh bawk a, hei hi chu chhui chiang turin hriat kan nei tlem.

Assembly Debate kan en chuan Pu Robert-a khan PMJVK hnuaiah hian department dang pawhin project an thehlut ṭeuh tih a sawi a, chu chu sorkar laipui lam khan an rawn pe ve lo va, Sports aṭanga an theh luh kha a tlang duh hle si a ni. State dang chuan Health Department lam ah Project an kal tlangtir thei hle a, Education lam pawh a tlang ṭha thei tih State dang hna hmuh dan aṭangin a lo lang a, Mizoram Health department leh Education department chu project siam thiam lo angin a thang ta a ni, hei hi YouTube lam pawh en let ula an debate aṭanga lo lang a ni.

Health Minister Dr R Lalthangliana tan chuan kha Debate kha thil ngaihnawm lo ber a ni ang, Health Department tan PMJVK hnuaia hna hmuh theih loh kha Opposition lamin an veipui hial a ni. Pu Lalchhandama Ralte tan chuan zahthlak tak a ni bawk a, ani zet chu NABARD aṭangin sikul building cheina tur mualphopui tham 'LOAN' an puk hial a, State dang chuan Education atan PMJVK aṭanga sum an hui luh theih laiin Mizoram Education lam chuan Project an thehlut chungin an hmu ve thei lo va, loan an puk a ṭul a, chutih mek lai chuan Mizoram aṭang thoin Sports chuan an hmu thei bik si. Team anga thawhhonaah chuan a muang fal an awm a ṭhat loh ang thoin a che rang fal an awm hi a ṭha chuang lo a, Assembly Debate kan en chuan tuna Ministry team work hi a ṭha loin khi a awm a ni, a chhungah hian.

- Marinawma, Dinthar