Party au hla pakhat OPS

Mizoram budget session neih meka kar liam taa Chief Minister-in a tarlan danin Mizoram sorkarin pension atana kum khata sum a sen zat chu cheng vaibelchhe sang a tling. Kumin February 1-a union budget pharh zawh takah khan pension atana pawisa dah kha Rs 2.34 lakh crore a ni a, defence tih loa pawisa dah tam berte zinga mi a ni hial.

Old pension scheme (ops) hnuaiah sorkar hnathawk pension tam tak an awm tawh a, an la awm belh zel pawh a rinawm. Sorkarin a chhawr tawh lohte hnena sum a sên zat hi tam tham tak a ni. Haryana Chief Minister Manohar Lal Khattar chuan central lama government official pakhat hnen aṭanga a WhatsApp message dawn chungchang sawiin, old pension scheme hi kan hmang leh a nih chuan pension-a pawisa ṭhahnem tak kal vangin India hi kum 2030-ah chuan a bankrupt hial ang, a ti.

India sorkarin inrenchem taka sum a hman theih nan te, development lama sum a sen tam theih zawk nan te, nakin hun thlir chunga sorkarin pension-a sum sen a tlem chhoh hret hret theih nante leh, ram development lama hma a sawn chhoh zel theih nan tiin new pension scheme hi India sorkar chuan an rawn duang chhuak a ni.

He new pension scheme hi old pension scheme nena khaikhin chuan sorkar hnathawk pension-te tana hamṭhatna tlem zawk niin a lang a, mahni hamṭhatna ngawr ngawr thlir tan chuan old pension scheme hi a thlanawm zawk hmel.

State ṭhenkhat Rajasthan, Chha-ttisgarh, Jharkhand, Punjab leh Himachal Pradesh-ah te chuan old pension scheme-a an let tur thu an sawi tawh a, keini Mizoramah pawh Congress party chuan sorkarna an chan chuan old pension scheme-ah kan let leh ang an ti.

Party campaign nan emaw kan party-in sorkarna kan chan theih nana old pension scheme-ah kan let leh ang, tia sawi hi ram economy veite tan chuan thil âwm lo a ni. Mizoram chu India rama state hausa lo pawl kan nih bakah intodelh lo ber pawlah kan tel ngei a. Hei vangte hian ram hmasawnna tur kan ngaihtuah tak tak dawn a nih chuan development lama sum dah tam theih hi a pawimawh khawp mai.

Tuna Mizoram sum dinhmun thlir phei chuan sorkar leh tur tan pawh, a lo berah kum khat tal sum lama insiamṭhatna kawng kan zawh a ngaih hmel a, pension-a sorkar sum kal tam tak hi sorkar phurrit (burden) a ni. Ram hmangaihtu thinlung pu tan chuan old pension scheme hi Mizorama hmang leh turin sawi mam chi a ni lo ang.

- Hrila Pautu