HARH TEH U!

Patling, kei ka ni inti ve siin Party Politics âtchilh a, ram leh hnam tâna hmasawnna tur lam aia tu emaw, party hruaitu lawk deuh, MLA or Minister an nih ve tâk mìalin tia zui duan duan a, tute emaw 'kid'-a in ṭang reng peih mai hi in fate an zak ṭhin tih in hre lo em ni?

Ṭhalai lehkhathiam leh bright tak takin politics in han zawm a, neutral rilru leh thingtlang kuthnathawktu rilru aṭang chuan beiseina thar min petu, min tilawm veng vengtu in ni. Mahse nangni pawh hi Political System dik lo siamṭha turin in lût emaw kan tih laiin, System awmsa dik lo tak chuan a lem zo che u a. Mahni Party chhunga thil dik lo te, Party hruaitute thutlukna dik lote siamṭha tura pènchhuak ngam in awm miah lo. Pèn chhuah ahnêkin in pute dik lohna thupbo tumin in hmanhlel a. Chutichuan ram leh hnam tan mi chhenfâkawm ni turah in inngai ve leh ngawt a, bei in tidàwng.

Tuna kan Politician tam zawk, a Senior leh Junior deuh zingah hian mahni hmâ sial lo, hamṭhatna beisei lova ram tana inpè an awm nawk ang. Mahse chutiang mi chuan principle nei taka politics a zawm a, dik tak leh huai taka ram hmasawnna tur leh mipui hmâ ngâia a ngaihdan a sàwi fo chuan, kha a telna Party-ah khàn a tlatlum lo tial tial a. Ram siam ṭha turin dinhmun pawimawh a chelh thei ta ṭhin lo a ni.

Thiltithei ni tur chuan dinhmun pawimawh chelh phâk a ngâi a, chutiang dinhmun pawimawh chelh phâk tur chuan sum nei sa ṭên ṭâwn nih emaw, sum nei lo pawhin Senior lo awmsate lung tiàwi thei nih a ngai a ni. Hei tak hi kan buaina chu a ni. Chuvangin mi dik i nih a, ram i hmangaih bawk a, system awmsa i siam ṭha thei dawn lo a nih bawk chuan tuna kan political party neihsàte hi zàwm lo ngam rawh. Tu emaw, ram hmangaih lo, mahni hmasial, mi corrupt lutuk 'kid' mai mai atan inphal suh.

Tuna kan ṭhalai politician zingah Minister, MLA or party Hotu lu deuh zui thei, an kianga hun hmang tam thei, an ina zanriah kil thei nih vel intihtheihpui an ṭhahnem. Hetiang hi ni ve duh ila ni thei kan tam ang chu. Mahni ka'n insawi ve lawk teh ang; tuna kan Minister / MLA zingah hian (Sorkar hmasa pawh tiamin) ṭhian 'close' tak ka nei ve nawk, anni pawhin an tana mi ṭangkài ka nih ve dawn phawt chuan min siam len an hreh lo fur. Mahse retheih huamin ram leh hnam tân ka la Neutral fan a, an dik lohnaah huai takin ka sawisel mai ang a, an thiltihṭhatah erawh lawmman beisei lovin ka fak ang. Chu chu ka tih ṭhin dan a ni.

Hawh u, retheih huamin ram leh hnam vei ila, 'dik' chu dik, 'dik lo' chu dik lo ti ngamin politics pawh khèl ang u. Arvind Kejriwal-an Delhi CM a nih hnua Delhi a thlâk danglam nasatzia te, Laloo Prasad Yadav-a te chhungkuain Bihar an sawp chhiat vek hnua India ram State hmasawn ber ni thei tura Bihar rawn tungding leh thei Nitish Kumar-a hmalâkna te, hausakna thlahlel lo Tripura CM ṭhin Manik Sarkar-a'n Tripura State a tihhausakziate han thlir ila, an awhawm asin, mahse Kristian an ni ve hauh si lo. Mizoram Kristian Politician-te hian Krista rilru pu chungin hna thawk se, tuna kan sawi lan tâkho aia ropuiah hian Mizoram hi an hlângkai daih tawh ang. Mahse Mizoram chu a la rethei a, hmangaih taka enkawltu kan Politician-te erawh an hausa thur thur chu a nih si hi.

Minister, MLA, etc. te hi Voter-te avang chauha hetiang dinhmun thleng an ni. Chu'ng voter-te chu tute'n nge hmin kan tih chuan anmahni hmintu chu campaigner-te an ni. Campaigner-ho chu tute nge kan tih chuan, unit, block leh party headquarters-a hruaitute. Campaigner-te chuan mipui nawlpui hamṭhatna tiamin an campaign-pui, candidate-te vote turin mipui an thlêm. An campaign-puite an han tling ta chiah a, mipuiin hamṭhatna an dàwn hmain candidate tling tà leh a campaigner-te khan hamṭhatna an lo insem zo deuh vek hman. Mipuite kan harh a ngai. Hetiangho bàwl mai mai atan kan inphal tawh tur a ni lo.

Party Worker, Campaigner-te pawh in harh a ngâi. Rim takin Party tan, in Candidate-te tan in thawk a. MLA Term khat chhungin in campaign-pui, MLA-a tling tate kha chu crorepati an ni hman deuh vek. Nangni eng nge in nih ve? In zinga tlêm tê khân contract or supply lian tham deuh an dawng hman ang a, a tam zawk kha chuan kum 5 chhungin Contract Nuai 20 man pawh in hmu hman lo ang. Chuti ni si eng vangin nge Campaign lai khan ṭhenawmte nena inhmu sakhi khawpa ṭan in lo lâk ve chiam? In ât vàng. Mi 'kid'-a ṭan reng kha zak ula, harh tawh teh u.

A tlângkawm nan, party politics hi âtchilh lo ila. Fîm takin thlîr ila. Inthlàn dawnah eng Party hian nge manifesto nei ṭha, an manifesto tipuitling thei turin an Candidate-te an ṭha tâwk em, CM atana an mi tawktarh hi a rinngam ang em, eng ang mi nge CM atan an tawktarh, an Flagship Programme-in ram hmasawnna a thlen thei tak tak ang em, etc. te thlîr chungin vote thlâk ila. Khawtlang pa ràwn leh ṭhalai lehkhathiam pawh party mal tan leh candidate mal tana phusa chiam lovin indah hlu thiam ila, chutianga kan tih phawt chuan tun aṭanga kum 10 lo awm leh turah chuan Mizoram hi State dangte awh khawpin kan káng vah tawh ang a, thingtlang kuthnathawkte pawhin leirem an rap tawh ang.

I harhchhuak teh ang u!

- James Ramdinmawia