PMJVK-a Education Department sum hmu lo leh NABARD Loan

Assembly Budget Session ka lo thlir ve a, School Education Minister Pu Lalchhandama Ralte kha eptu lam khan an chhaih thinrim zo lo chu a ni ber a, NABARD loan puk chungchangah khan an tih dik loh a awm kha a pha kual lova a pawm a ni, tih ṭhat pawh a duh nia a lan lai khan Private Member Resolution an sawiho khan Sports lamin PMJVK aṭangin a vaibelchhe tel pawisa an lak chhuah lai khan, School Education department lam Project kha pawm a ni ve ta si lo tih kan lo ngaithla a, kan Education Minister hi a va khawngaihthlak em ve! kan ti lo thei lo a ni. Education building sakna turin NABARD aṭangin rulh leh tur cheng nuai 3500 a ṭul ta a ni.

PMJVK kan luh tak tak hmain MNF mizia ni ṭhin lo en ila. MNF Party ah chuan Seniority an dah pawimawh ṭhin tih a nih avangin Minister te Portfolio an insem kual dan dan khan Pu Lalruatkima kha Cabinet Minister a nih ngei ngei mipuiin kan rin laiin, amah aia Party lama Senior zawkte kha Cabinet an rawn ni ta fur a, kum 2013 leh 2018 inkara MNF aiawha au ber kha Minister of State ah dah a ni ta tlat si a, MNF-in Seniority an dah pawimawh tihna a ni. Budget Session ah chuan Sports Department changtu Project chu PMJVK chuan a pawm zung zung a, nimahsela Mizoram aṭanga School Education Department project siam ve chu an pawm ngai si lo. Minister Senior zawk hian sawipuitu a nei ṭha lo tihna nge? An Department hi an zei lo zawk? tihna a ni thei zawk em ni? Education a pawimawh tehlul nen PMJVK Project ah pawm an ni ve lo.

PMJVK hian School Education lam hi a pawm lo rêng em ni? tih zawhna han inzawt dawn ila a teuh si lo va, State dangah chuan Education-ah hian Project tam tak an lo pe si a, Mizorama Education department Minister Pu Chhantea hi a chak lo fal bikin a thiam lo em ni? tih zawhna kan zawt lo thei lo a ni. MNF lama Senior zawnga senior ve thawkhat tawh tak a ni chunga PMJVK Project a chang ve thei lo hi ama thiam loh hulhual nge ni ta? A khawi laiah hian nge dik lo chu awm ta ang le?

State dangte Project hmuh dan hrang hrang hmán deuhva chanchinbu lama rawn chhuak chin kha kan en chuan, Mizoram ang thoa tribal tamna state Arunachal Pradesh chuan PMJVK Project hnuaiah hian Additional Class Room Project 8, Anganwadi Centre Project 2, School Building Project 2 leh Hostel Project 7 an hmu thei a ni. Arunachal hian School Education atan PMJVK Project an hmu thiam a, chutihlai chuan Sports pawh an hmu thiam tho va, Sports Project 2 an hmu tel a, Arunachal Pradesh chuan Education leh Sports atan Project an nei kawp thei a ni. Kan School Education Minister hian kan Sports Minister ang tho hian PMJVK aṭang hian Project hi siam ṭhin se an pawmpui ve zung zung thei dawn lo'm ni? tih hi chhan a ngai a ni.

Manipur hian PMJVK aṭang hian College Additional Infrastructure atan Project 2 an nei a, anni hi chuan Health lamah Project 67 nei telin Hostel Project 12 an nei. State ṭhenkhat hi chuan Education atan project pawmpui tur hi an han siam thiam khawp a, Maharashtra hian Additional Classroom Project 221 leh Computer Lab Project 5 an neih bakah hian Teaching Aid Project 1,480 an hmu a, hetiang hian PMJVK hi Education atan an hmang a. Mizoram chuan zirna atan PMJVK kan hmu ve theo lo va, phullem phahna tur chu an nei zung zung bawk si hi a mak hle a ni! PMJVK enkawltu lam pawh hian an tifuh lo a ni. Uttar Pradesh hian Additional Classroom atan project 44 an neih piah lamah "School Building" tiin Project 6 an hmu a, School Furniture tih phei chu Project 296 an hmu hial a ni. Gujarat hian Additional Classroom project 31 an hmu a, School Building Project 8 bakah Education lam kaihhnawih Project an hmu tam khawp mai.

Mizoram School Education Department hian Mizoram Sports department ang hian project hi zu hai chhuak se chu NABARD Loan hi puk a ngai lo tur a ni si a. Mizoram School Education Department hian NABARD-ah Mizoram School 172 thawm ṭhatna tur atan cheng nuai 3500 a puk an ti si a, PMJVK hi hmang ṭangkai se chu ṭhangtharte chanpual aṭanga rulh chhoh mawlh mawlh tur hian sum puk a ngai lo tur a ni.

PMJVK aṭanga pawisa lak chhuah kan mamawh chhan chu sikul ṭha tehna Performance Grading Index for Districts (PGI-D) lamah khan Mizoram leh Arunachal Pradesh chuan District tichhe ber pasarih zinga paruk kan nei an ti kha a ni a. Arunachal Pradesh chuan ṭan lain PMJVK aṭangin Project an siam a, sum an lalut a, Mizoram School Education department pawhin Project an siam ve tho va, Sports Department Project a tlang laiin School Education Department Project a tlang ve thei si lo. Heng hi House lama "Pu Speaker" ti ve thei lote hian kan lo ral thlir a, he sorkar kalphung en hian dik lo a awm tihna nge ni? Project siam thiam lo School Education Department hnathawktu leh bawhzui thiam lo Minister kan nei zawk em ni? PMJVK hi dil chhuah thiam riau a awm tihna em ni? Sports lama hmasawn tur hian min duhsak ta riau em ni; PMJVK lam khawihtute hian? Education hi eng vangin nge PMJVK hian an pawm loh? Hengte hi Assembly Hall pawn aṭangin kan lo chik a ni.

- Lalhmachhuana