India rama Chief Minister upa ber leh naupang ber

India ram hi tun hma ang lo takin Politician an naupang tawlh tawlh niin a lang a, kan Chief Minister Pu Zoramthanga hi India rama Chief Minister upa ber a ni mek a, Official Record-ah chuan July 13, 1944-a piang a ni. Tunah hian kum 79 na a hmang chho mek tawh a, nakumah kum 80 a tling tawh dawn a ni.

India rama Chief Minister naupang ber chu Arunachal Pradesh CM Pema Khandu a ni a, ani hi August 21, 1979 ah a piang a, kum 44 chauh a la ni. Tun hnaiah Arunachal Pradesh in kawng eng kima hma an sawn chak chhan hi hruaitu tunlai leh hawi zau, kum lama la naupang leh viak ṭha in a enkawl vang a ni thei em? tih zawhna hi chhawp chhuak ila a ṭha a ni.

A naupang ber dawttu pawh hi Conrad Sangma a ni a, Meghalaya Chief Minister hi January 27, 1978 a piang a ni. Kum 45 chauh a ni a, tunah hian a term a hmang zo dawn tawh a, mi state hian Chief Minister naupang ṭha tak tak an nei tih kan hmu mek a ni. PA Sangma fapa a nih vanga lar a ni ringawt lova, Conrad hi lehkhathiam leh ṭawng thiam tak, thusawi thiam em em a ni tel a, St. Columba's School, Delhi bakah USA lama Wharton School of the University of Pennsylvania lamah a zir leh a, Imperial College, London aṭangin Finance-ah MBA a zo leh a, kum 30 lek a nih khan Finance Minister pawh a lo ni tawh a ni.

Naupan lama pathumna chu Jharkhand CM Hemant Soren a ni a, August 10, 1975 ah a piang a, kum 47 a ni mek. A pa hi CM hlui tho Shibu Soren a ni a, amah pawh naupang te in Deputy CM a ni tawh a, kum 10 kal ta kum 2013 pawh khan CM a lo ni zawk tawh a, state dang hian politician naupang te te hi hotu lu berah an lo hmang fo tawh a ni.

India ramah hian Chief Minister pasarih hi kum 50 hnuai lam an ni a, a dang panhga hi kum 60 tling lo an ni bawk. Kum 60-70 inkarah hian mi 10 an awm a, hetia kan en hian tun hmaa state dangah hian Chief Minister upa tak tak ang kha an lo awm ta mang lo.

Chief Minister upa deuh te hi en ta ila Pu Zoramthanga dawta Chief Minister upa ber chu Pinarayi Vijayan a ni a, Kerala CM hi May 24, 1945 ah a piang. He pa hi a hnathawh ṭhat avanga fak hlawh a ni a, mak ve tak chu Kerala ah hian CM hi a zawnin an tling thei ngai lova Pinarayi hi chu a thawh ṭhat avangin 2016 a thlan tlin a nih hnuah a tling nawn leh a, Election Manifesto a neih 600 zinga 570 a ti hlawhtling tiin an chhut hial a, kum upa tawh mahse mipuiin an la duh a, Kerala hi Fully Electrified State hmasa ber leh Open-defecation-free State hmasa berah a hlang kai nghe nghe a ni.

CM upat lama pathumna chu CM lar tak Odisha Chief Minister Naveen Patnaik hi a ni. He pa hi India rama Chief Minister ni rei ber a ni mek a, kum 2000, March thla aṭang khan Chief Minister hi a lo ni tawh a, tunah hian kum 77 a ni ve tawh a ni. Patnaik hian rethei chawi kan a kalpui a 'pro-poor policies' hmang in an state a chawi kang a, mipuiin an lawm em em a, a kum tam deuh mahse an la iai lo a ni.

- Lalmuanpuia