Mizoram mamawh chu kan hre tawh a ni

Mizoramin sorkar ṭha leh chak din turin mamawh a neih hi Kohhran Upa a ni lova, PhD a ni lova, YMA leh MZP hruaitu hlui a ni lova, Zu in lo pawh a ni lova, a mamawh chu midik leh rinawm, sum leh pai eiru lo a ni tih kan hmu ta.

Kan sorkar hi han en vang vang ula kan MLA neihte hi an va han chhuanawm ṭheh ṭhawh ve le. February 1, 2023, Nilaini Vanglaini chanchibua Vanlalliana article rawn ziah kha ngun tak hian ka lo chhiar a, kohhran leh khawtlang hruaitu hlang an ni hawt e kan ruling MLA te hi. Thiamna lamah pawh Master Degree piah lamah zir tawp thleng thei PhD an ṭhahnem a ni. Engineer pawh pakhat aia tam an awm a, MBBS te, MPhil te, Law lam thiam te pawh an ni.

Mizo ngaihsan em em dang leh chu "Kohhrana in hmang" tih hi a nia Kohhran hruaitu ṭheh ṭhawh MLA rual kan nei a, Ruling leh ling lovah pawh chutiang chu an ṭhahnem a ni. Central YMA hruaitu hlui te, MZP hruaitu hlui tihte hi chu kan MLA zingah awm loh lai pawh an nei tawh lovang politics kailawn ṭha a ni si. Mahse ka ti duh a, kan ram hi a va ṭhang si lo em!!!!!

MLA/Minister ṭha chu PhD leh D loh a ni lova, a Kohhran Upa leh Upa loh a ni lova, a YMA leh A loh pawh a ni lova, eiru lo ngam hi a ṭha chu an ni. Mahni Department hnuaia hnaa 'Share' nei lo ngam an ni tur a ni. Departmental a hna tam tak pea thiam taka lo la pêng ṭhin an ni tur a ni lo. Restricted Tender lova hna lian sem ngam an nih chuan Upa leh PhD a ngai lo, midik leh huaisen an ni tihna a ni a, tunah chuan hetiang mi hi an vang hle

a ni.

- RC Vanlalduha