Budget 23-24:6 K DEPOSIT THLAHRANG
'K Deposit' an tih ṭhin hi kan hman sual avangin pawisa 'Thlahrang' hlauhawm tak a ni tawh, ka'n ti teh ang.
K Deposit kan tih ṭhin hi sorkar sum sawina thupui (head) 13 zinga pakhat a ni. Heng head hi no. 1, 2, 3... a kal lovin no. A, B, C... in a kal a. Chumi kal chho zela no. K chu K. Deposits and Advances a ni a. Hei hi hlawm thuma ṭhen leh niin (a) chu sorkarin sum a neih sa, hman mai theih si loh bank-a pung neia dah ṭhat a ni. (b) chu sorkarin sum a neih sa, hman mai theih si loh RBI (Reserve Bank of India) a pung nei lova a dah ṭhat a ni. (c) chu sorkarin pung nei tura midang a puk tir a ni.
No. (a) hi sorkarin a hmang vak lo a, budget document aṭanga en phei chuan a hmang ngai lo ni hialin a lang. Chutihlai in Department leh officer lian tam takin a rukin hetiang thil hi an kalpui a. Tunah pawh hian enfiah se cheng vaibelchhe tam tak a awm chiang a ni. Officer lian ṭhenkhat phei chuan mipui (sorkar) sum tam tak tak anmahni bank account-ah, Dan kalhin, a rukin an dah a, a pung an nei ṭhin.
No. (c)-ah hian cheng vbc 8 sorkarin a neia chhut a ni. Hei hi a puktuten an rulh reng avangin thil ṭha a ni a, hetah hian ngah hle ila kan ram tan a ṭha a ni.
'A thlahrang' lai tak chu No. (b) hi a ni. Hetah hian sorkarin cheng vbc 1,550 a nei anga chhut a ni. Hei hi 'K Deposit ah an dah a...' emaw 'An K rih a...' kan tih ṭhin hi a ni. Hei pawh hi kalpui dan dik taka kalpui chu ni se a tam poh leh a ṭha a ni mai.
'Thlahrang' a nih tak chhan chu hetiang hi a ni: March thla a ral khian, hetah hian, a chunga sawi ang khian, sorkarin cheng vbc 1,550 lai nei tur anga budget document-ah tarlan a ni a. Hriat awlsam zawnga sawi chuan March thla a ral khian sorkarin RBI-ah cheng vbc 1,550 a nei dawn tihna a ni ber a. Chutihrual vek chuan heng hi hnathawhna bill, la pek chhuah loh tlingkhawm a ni ber a. A bak awm pawh hnathawhna tura ruahman fel tawh sa a ni.
Cheng vbc 1,550 pawh chu awm se lakchhuaha bill neitu hnena pek leh deuh vek tur a ni a, a bak pawh chu hmanna tur ruahman saa hman vek tur a ni.
Chutihlai chuan budget document kan en chuan March thla a ral khian Mizoram sorkar chu cheng vbc 640.01 a indaih lo tura tarlan a ni. A awlsam zawnga sawiin RBI a kan ram account ah pawisa cheng khat mah awm lovin cheng vbc 640.01 kan ba lawk zawk dawn tihna a ni.
Hetah tak hian K Deposit kan tih ah, chutah pawh no. (b) ah cheng vbc 1,550 awm anga kan tarlan chu a takah a awm miah lo tihna a ni ta a. A tak takah chuan sum indaihlohna cheng vbc 2,190.01 kan nei tihna a ni zawk a nih chu! Hemiah hian kan state leiba kan la sawi tel lo tih hriat ni se.
'Cheng vbc 1,550 kan K' kan tih hi pawisa tak a lo awm reng reng lo a, pek ngai a nih si avangin Thlahrang a lo ni ta a nih chu!
Nang leh kei hi kan state leiba phurtu kan nih thu kan chiang. Chu mai chu ni lovin nang leh kei hi cheng vbc 1,550 Thlahrangin min bawh mek a nih hi!
Talchhuah dan tur ngaihtuah a va ngai kher em!
- Vanlalruata