Political party, politician leh worker ten An hmalaknaah faina ngai pawimawh se

Aizawl khawpuiin G20 Business Meeting a thlen dawn avangin khawpui thenfai leh chei mawi lamah sorkarin ṭan a la chho hle tih a lang a. Khawpui chhung chung lama hrui zam buai chuar lutuk pawh tunah chuan a ziaawm ta hle. Hmalakna dangte pawh hmuh tur a awm.

G20 meeting hi MNF party ni lo, party dang sawrkar laia thleng ni ta se, tuna sawrkar hmalakna leh inbuatsaihnate hi an hmalak dan tho tur a nih a rinawm.

Chutiang a nih lai chuan, Congress party chuan kar hmasa, February 16, 2023 khan sorkar hotute demna lam thu poster tam tak an tár ṭeuh mai a, khaw danga an tàrte nen phei chuan poster 15,000 lai an tár niin an insawi a; a tam hle mai. Mahse, poster tàrte chu a senghawi lam an ngaihsak zui tawh si lo a (?), bawlhhlawh, khawpui tiṭawptu maiah a chang zui a! Khawpui tihfai/chei lam buaipuitute tan chuan a huatthlala ve ngawt ang. Chubakah, Mizo mipuiin hma kan sâwn ve zel a, faina lama kan inzirtirnate leh ṭan kan lâka hma kan lâk chhoh dante nen a inhmeh lo viau bawk.

Covid-19 vanga inkhuahkhirh nasat laia TV-a live crusade an tih ṭhin lai khan ṭum khat chu tun hma deuha speaker lâr ve tak ṭhin pakhat hian thu a sawi ve a. Thu a sawi dan kha tun hma deuha speaker tam takin an chîn, ti deuh duai duai, pehhêl kual deuh duah ang chi kha a ni a; a thusawi (content) kha a ṭha lo pawh a ni lo, a sawi dan kha chu tunlaiah chuan an uar tawh vak loh a ni a, ngaihthlak a nuam teh chiam lo, ṭhalaite phei chuan an ngaihthlak peih loh chi tak a ni ang.

Politician zingah pawh hránghlui deuh chuan mipui han vehthlêm vel dan hi tun hmaa an tih ṭhin dan kha tun thlengin an la chíng a; ṭhangthar politician-te thusawi dan nen chuan a inang tawh lo hle.

Hun kal zelah mipui rilru sûkthlêk a danglam hret hret a, new media an ti a, media kalphung a danglam tawh em em a; thil tam tak a inthlâk a, thusawi dan kalhmangte (a thlûkte nen lam), Pathian thu sawi dante thlengin a danglam hret hret a nih hi (an Pathian thu sawi ni loin, an sawi dan).

Chutiang zelin politics khelh dan te, chumi atana hmanruate pawh tihdanglam chho ve hret hret a, tihchangkan ve zel a ngaiin a rinawm. Hránghlui zawkte pawhin tun hmaa an chìn ṭhin angte kha tunlaiah chuan a fuh kher lo thei a, a ṭha vek tawh lêm lo tih hriain, tihchangkan ve zel an tum a ṭul àwm e.

Politics thila kan hmalakna leh kan chêtnaahte hian hmasawn zel a ngai. Tunlaiah faina lamah nasa takin mi an inzirtir a, ṭan an la a, intihsiakte pawh kum tin buatsaih a ni ṭhin. Chutiang a nih avang chuan tifai leh si loa khawpui chhung leh khawlai tihhnawk ang chite hi kalsan a hun ta viau. Kan chêt velnaah tihhnawk kan nei a nih pawhin, a hnuah tihfai leh zel ṭhin ni se a ṭha ngawt ang. Chu chu ram hruai tum party, ram hruaitu nih tum politician-te tan phei chuan ngaihthah hauh loh chi a ni.

Kumin hi inthlan kum a ni a, political party-te'n hmalakna an ngah dawn a, an che tam ngei dawn. An pung khawm a ni emaw, kawngzawh an huaihawt a ni emaw, poster an tár a ni emaw, thil dagn an ti emaw pawh ni se, faina ngai pawimawh zel thei se a lawmawm ang. An chêt velna leh thil tihnaah bawlhhlawh leh hnawmhnawk kalsana hnutchhiah mai loin, tifai leh zel ṭhin se, a va mawi dawn em. Mipui hîpna ṭha tak pawh a ni thei hian àwm asin!

Thuziak (poster) tàr chungchangah, hun eng emaw ti chhung chu intár se kan duh a ni thei a, a àwm rêng bawk a. Chutih rualin, February 16, 2023-a poster tàrte kha hun eng emaw chen chu a intár ta a, G20 meeting atan sawrkar leh khawpui a inbuatsaih mek bawk nen, senghawi a hun leh tawh viau lo maw? Poster tàr hnatlang kan ko thei a nih chuan, senghawi leh tihfai hnatlangte pawh kan ko thei leh mai dawn lo'm ni?

Tun ṭumah hian political party lam kan sawi bik a ni mai a, páwl dangte pawh kan sawi tel nghalah ngai ila. Kan hmalakna rêng rêngah bawlhhlawh leh hnawmhnawkte hnutchhiah mai loin, tifai leh zel thei ila, hmuh theihin hma kan sawn mai bakah, kan rilru sûkthlêk pawhin hma a sâwn tih a hriat theih dawn zu nia! Rilru lama hmasawn a pawimawh tak zet a, rilru lama hmasawnna hi a taka lan chhuahtir a ngai e.

- K Zothanpara