Sorkarin mipui min hmuhsitna

Lengpui Airport chu KR Construction chuan a siam a, duhsakna uchuak nen restricted Tender hmangin an pe a, a siamtu hi Kamrul Islam Laskar a ni a, a Mizo hming chu Kamlova Chhangte a ni. Vanduaithlak tak pawh ni lo, sak chhiat vang liau liauin Lengpui Airport Terminal Building sira Baggage Make Up Area a sak chu nikum March 22 khan a chim.

Kan Airport neihchhun siamna tur sum tam tak Covid vanglaia nei thei siin a han sa chim mai hi chu a thinurthlak a, kan pawisa; mipui pawisa hmanga sak a ni. A sa chimtu hian Police Case pawh a nei lo hi a mak bakah PWD lamin a contract hna an cancel lo pawh hi a mak a ni. Hripui lai pawha chawl loa an sak char char, chu bakah Chief Minister Pu Zoramthanga ngaih pawimawh em em ni chunga an sa chim hi chu PWD Minister hian hrem turin a ti ngei ngei tur a ni.

Hrem chu ka ha se a ni mai, an hrem lo va, an chawimawi zawk a ni. March ah Airport a sa chim a, June 9, 2022 ah chuan Class I Contractor ah a kaisang. Kan Airport neihchhun sa chimtu, a sak chim aṭanga thla 3 pawh a zawh hmain PWD chuan Class I Contractor ah a kaisantir a nih chuan, hei hi Mizoram sorkarin mipui min hmuhsitna a ni.

Kan pawi khawihtu, kan Airport sa duhdahtu hi mipuiin kan dem laia a kaisantir ta mai hi chu he sorkar hian mipui rilru natna a hre duh lo va, kan pemah chi a al ta sak niin ka lo hmu a, kum 2023 ah hei hian nghawng na tak EVM hmaah a neih ka ringhlel lo.

- Vanlalliana, Chanmari West