FAHRAHTE CHAW BEL KAN HMU TAI ZUI ZEL EM NI? EM EM ANNA!
Nikum khan fahrahte enkawlna tur central aṭanga dawn, hren beh a nih vanga harsatna an tawh thu kan lo au chhuahpui tawh a. Khami hnu lawk khan April-June chiah an pe chhuak a, nikum June aṭangin tun thlengin pek zui an nih leh tak loh thu fahrahte enkawltu zinga miin kei tehluh hnenah hian a rawn zualko leh a. Thu chiang zawk zawh ka tum lahin, biak pawh theihna ka lo nei tawh si lo. "Tun kar chhung ngeiin rawn ziak rawh" a ti mawlh mawlh mai si a. Hriat chian lehzual pawh ka chak lo, hriat ril poh leh rilru a na mai mai.
Hmanah khan: Social media aṭanga thu ziak kan hmuh chu, "Kum 2021 khan Central aṭanga naupang hnuchham enkawlna Home-ten ṭanpuina an dawn ṭhin chu kum khat dawn State Sorkarin a tih khawtlai sak a ni.
Mizoramah hian hetiang Home hi 25 vel bawr a awm a, Sorkarah dan anga in ziak lutin Central aṭangin ṭanpuina pawh State Sorkar kaltlangin an dawng ve ṭhin a ni.
Central aṭanga ṭanpuina an dawn hi thla 4 dan (Quarterly) in an dawng ve ṭhin a, ṭanpuina chu Home neitu ten Fund dawn tur zat aṭangin 10% tumin a bak 90% chu Central-in a tum sak ṭhin a, naupang pakhat tan thlatin Rs. 2160 dawng ang an ni. State Sorkar a Social Welfare Department kal tlangin bei tham te chu an la ve ṭhin.
July 2020 aṭang khan Central aṭanga an sum hmuh tur chu State Sorkar aṭangin an dawng mumal ta lova, kum khat dawn chu an kal naw naw hlawm a. CM te, Finance Commissioner te hmu in sa ṭah chhuak pek ang maiin an dawng leh phauh ṭhin a.
Kum 2021 April thla aṭanga kum 2022 January thla thleng Fund an dawng lo a. Home lam enkawltute hriat danin Central aṭang chuan release a nih tawh thu hriat a ni a, State Sorkar chuan thla 10 teh meuh an hrensak hnuah, nikum April -June khan an pe chhuak a, tunah thla 7 chhung chu an pe chhuak leh ta lo vang vang a ni awm e.
Sumah kan harsa viau lo a ni lawm ni?: Tun ṭum State Assembly-ah Sport infrastructure lama kan hnathawh ropui fakna kan auchhuahpui a, kan sum hman zatte kan lo hriat phah a, tam hem hem tak a ni. A dawhthleng kan siam thiam chuan, a rawn khawh lut hum hum mai chu a nih hi. A dawhtleng erawh kan dawh rual lo deuh a ni maithei. A lehlamah chuan fahrahte fairel bel hial pawh kan zen tawm duh ni mai awm takin kan lang leh si.
Kan hotute hian kan dinhmun dik tak rawn pho lang sela, fahrahte chaw bel kan lo zen ṭawm reng em tihte pawh hriat chian a va chakawm ve.
- Lalrinliana Colney