Inthlan kum Politics inlumlet
Inthlan kum hian politics inlumlet hi a awm ṭhin a, tun kum MLA inthlan lo awm turah hian politics inlumlet a awm leh dawn em le? tiin i nghak phawt mai ang hmiang.
He inthlan lo awm turah hian Central YMA Office Bearers ṭang lai leh a hlui an rim kual a ni awm a. Tin, milar pui pui an sawm nasa tih te kan lo ralkhat hriat ve bawk a. Inthlan ngaihnawm tak a ni leh dawn i han ti phawt mai teh ang.
Kan la hria ang chu, kum 2017 thleng khan Congress party kha an la derthawng lova, MLA 30 chuang nei kha a zatve dawn pawh tla ta se 21 kha chu inham tang thei turah ngaih an ni.
Chutiang dinhmun hlauhthawm awm loa an ding chung chung chuan cheng nuai 1 an sem zui a, chu bakah chuan hmingchhe em em khan an awm lova sum leh pai pawh an enkawl ṭha a, kum 2018 tawpa kan hmuh erawh kha chu MLA 5 ah an chhawk hmawk a ni.
Kum 2022 tawp lamah chuan Siaha MLA Dr K Beichhua chu Minister aṭanga ban tir a ni a, MNF aṭanga hnawhchhuah a ni zui leh bawk. Mahni duh thua Pu R Lalzirliana leh Pu Lalrinliana bang nen kha chuan a inang lo thei miah a ni. Anni pahnih bang ve kha chu anmahni chan ṭhatna tur zawk thlira bang an ni ngei anga ngaih theih an ni tlat.
A ral lehlam aṭanga thlir chuan kha ai khan MNF hi a nghawng chhe thei bawk a ni. Party a zawm tur kan la hre lo nachungin MNF tan chuan, Siaha MLA Dr K Beichhua bantir kha MLA bial khat chânna a ni ta pang a ni.
CYMA hruaitu nih hi Politics kailawn ṭha tak a lo ni tawh ṭhin a, hun kal tawh kan thlir chuan kan hria ang a, tunah pawh a la ni deuh zel mai. Sorkar hnathawk aṭanga banga in candidate tura sawmna dawng an awm ta a, hetih ve lai mek hian MNF MLA zingah seat chan loh hlau an awm ṭan an ti.
ZPM hian an MLA te hi an la ring reng dawn nge ni ang MNF angin huaisen takin MLA hi an chhawk ṭhen ngam dawn? Hengte hi kum 2023 chawhhnu lamah kan hre tawh ang.
- Lalmawizuala, Mission Vengthlang