KHAWVEL TAWP A HNAI EM NI? (THIL SIAM ROPUI RAPTHLAK)

Tunlai hripui leng mek hi natna hrikah chuan a te zual te an ni a, an tet em em avangin enlenna ṭha bik takin a hmuh theih chauh a ni an ti. 

Chutiang ang khawpa nunna nei, te si chu tu siam nge ni ta ang le? Siamtu ropuizia leh a thilsiam ropuizia i ngaihtuah ngai em? He virus hian khawvel eng a rawn hmuh tirh chuan Adama ang maia mal tlat, mah se second reilote chhungin maktaduai tam taka in tipung thei, ni rei lo te chhunga khawvel chawk buaitu a lo ni ta reng mai. 

Engkim siamtu chuan lei leh van leh a chhunga thil awm zawng zawng a siam lai khan siam hmaih a nei lova, thil lo la awm turte nen lam a siam vek a ni. Lalpa thil siam inthup tlat, a khuahkhirhna hnuaia awm, Lalpan hun a tiha lo lang chhuak tura a tih, chumi hma a lo ngaihven a lo hai chhuaktu emaw lo siam danglamtu chu Lalpan eng ang fakau­in nge a chungah mawh­phurhna a nghah ang? 

Sipai chakna leh ralthuam hlauhawmte chu he hripui lakah hi chuan engtihna mah an ni ta lo. A hlau lo apiang a sawisa nasa mai a, a laka inveng fimkhur thiam apiang an him. Sorkar chak leh ram liante chu a suasam nasa a, ram te leh hnam tlem deuhte chu a sawisa nep deuh niin a hriat. 

He natna fing leh zei tak, ṭihbaiawm si hian mihring taksa duh tawka a suasam hnuah a rawn inlar chhuah chauh ṭhin avangin fin­fiah pawh a harsa a ni. 

Khawvel sorkarin he natna hmuh theih loh hi an lo chelh ding thei lo a, a tikiang thei chu amah dintu hmuh theih loh ve tho Lalpa thlarau chuan a tikiang thei a ni tih hi hre tlat ang u. 

Mihringin arsiah te bu an chheh hunah leh thil nung nunna nei siam thei nia an inhriat hunah chuan chu chuan a lokallehna hun namen lovin a hnuk hnai dawn niin a rin theih. Thil siam hmuh theihte aiin thil siam hmuh theih loh te chu an hlauhawm zawk a. A lo kal leh hmaa thil lo thleng tur chhinchhiahna palite zinga pathum chu hmuh theih loh te an ni si a. Khawvel tawp hun hre lo mah ila hun hnuhnunga thilthleng turte chu a lo thleng mawlh mawlh ta a nih hi. ‘Tin, chung thil chu a lo thlen tirh in, en chho ula dak chhuak rawh u, in tlanna tur chu a hnaih tak avangin’ (Luka 21:28). 

Hripui lakah kan lo him theih nan chenna In aṭanga kan leng chhuak hla deuh a nih pawhin mite bul hnaiah awm tam lo ila. In thlen hunah kan thawmhnaw hak lai te su fai vek zelin kan taksate fai takin sil nghal zel ila. Chu chuan natna hrik, kan taksa leh thawmhnaw bal laia lo bei ṭhin te chu a tikiang dawn a ni. 

Kan hlauhnate chu kan fimkhurnaah chuan lo tawp tawh sela, fimkhurna tel loa hlauhna ringawt chuan awmzia a nei lo. Thu petute thupek lo awi zel mai hi hripui laka kan fimkhurna tur, kan himna tur, kan hlauhna tirehtu tur chu a lo ni e.