Kan leiba hi...

Dated 21.02.2023 Assembly budget session-ah budget sawihonaah chuan Mizoram Chief Minister chuan Mizoram chu state lian te nen khaikhinin Mizoram leiba a engto vak loh thu a sawi a. Kan Chief Minister berin leiba avanga Mizoram dinhmun ṭhat lohzia mipui laka thupbo a tum tlat hi a lungchhiatthlak tak zet a ni.

Hmanni chu kan veng sumdawng nu hausa hi a rawn leng a. In sak nan leiba cheng nuai 100 a neih thu titina ah a sawi a. A hmel aṭangin atan phur rit a ni lo tih kha a sawipah khan a lang reng, a tan eng vangin nge a phur rit a nih tehlul ang... thla tin cheng maktaduai chuang a sumdawnna aṭangin a dawr leh in luahmanah a lak luh reng bakah a sum khawl sa pawh vaibelchhe tam tak a ni.

A in kawta inzuar leiba cheng 10000 nei aiin a tan an leiba neih ve ve avanga an phur chu a zang zawk daih ang chu.

Leiba neih avanga dinhmun ṭha leh ṭha lo tehfung atana an hman ṭhin, Sum lakluh aṭanga leiba zat (GSDP to Total Liabilities) aṭanga tehin Reserve Bank of India (RBI) in an tarchhuahah chuan MNF ten an sawi dan ṭhin nen a in letling thawk a ni.

Mizoram hi India ram state zinga leiba nei hnem ber kan ni tlat mai.

2019= 34.9%

2020= 42.6%

2021= 56.7%

2022 (RE) = 55.7%

2023 (BE) = 53.1%

(Source: RBI)

- Lalhruaitluanga Bawitlung