Budget 23-24:7 SEDP Board tan cheng nuai 358.02
Budget session-ah SEDP Board ho hman atan Supplementary Demand-ah cheng nuai 358.02 dil belh a ni a. Budget thar turah hei hi tarlan a ni chuang lo.
SEDP tih hming kan hriata kan rilru a awm ṭhin chu 'cheng nuai thum sem' a ni a, chutihrual chuan an kalpui danah 'cheng sing nga sem' a ni rih a. Cheng sing nga zela sem ni dawn se he pawisa hi chhungkaw 716 in kan chang pha dawn tihna a ni a, a hlu tham viau mai.
Amaherawh chu, he pawisa hi, mamawh vang ni miah lova MLA ṭhenkhat lanmawi nana din SEDP Board ho hlawh leh inrelbawlna tur a ni a, a uiawm mang e. Tute emaw lanmawi nana heti zat mipui sum han hman ral mai chu leh!
Mamawh hlek loh heng Board hi ṭhiat se kan sum dinhmun hian a ziaawm pui hawk thei a nih si hi. Hetiang chi, tih tawpa hlawkpui theih hi kan va ngah! (ka sermon tui lutuk hmain duh tawk zawk teh ang)
Kan sum dinhmun chhiat chhoh zel laiin siamṭhat tumna hmuh tur a awm lo. Lanmawi tumin budget dik lo pharh zel a ni a. Sum hman ral thlawn (Revenue Expenditure) tur hriat lawk sa tam tak budget estimate-ah tarlang lovin hetianga thup ṭhen hmang hian pawisa chuang liam (revenue surplus) nei tur anga in tarlan ṭhin a ni a. Hetiang budget dik lo siam luih hian kan sum dinhmun a ti chhe zual zel a, a pawi tak zet a ni.
Kan budget hman lai (2022-23) hi a tirah hlawh tak ngial pawh indaih lo tura duan a nih thu kan sawi ṭhin a. Tunah a nihna lo lang chhuak tain supplementary demand-ah hlawh atan cheng vaibelchhe 215.81 lai dil belh a ni a. Sum dil belh hi a vai phei chuan cheng vbc 3,265.69 a ni a. A tam tham hle.
Hetianga lanmawi tuma budget dik lo siam a, tam tham tak tak siamrem (reappropriate) ngai ṭhin hi tih tawp a ṭul tak meuh a ni.
- Vanlalruata