Pu Duhoma leh Pu Roberta inhnialnaah Mipuiin a Subject kan hlah

Assembly Budget Session neih mekah Pu Lalduhoma leh Pu Robert Romawia Royte an inhnial a, an inhnialna kha subject lian tak sports person-te inhliam inenkawlna neih loh lam a nih laiin a subject peng pakhat, "Miriami chanchin i sawi," tih leh, "Ka sawi lo reng reng," tih kha kan Speaker bakah Social Media lama mipuiin kan tuipui ta viau a.

A subject pawi­mawh tak zawk kha chu Sports Infrastracture atana vaibelchhe tel awmna state ah hian infiammi inhliam enkawlna pawisa pawh sorkarin a tum thei lo tih a ni.

Politics inhnialna a nih chuan a dika dawk thlu lovin kan pawng ṭan chiam ṭhin a ni.

He inhnialnaah pawh hian Assem­bly House-ah Pu Duhoma khan Pu Roberta kha a sawi loh sawiah a puh avangin thupha a chawi tawh a. Pu Roberta khan Miriami phone a dawn leh dawn loh chungchangah ban a ngam thu a sawi a, a bang ta si lo tihte hi chu a thupui lak penna a ni a, a thupui ber zawk chu kan infiammite khawngaihthlak zia hi a ni.

Mizoramah hian Sports hi tih tak tak tlak a ni lo tih hi ka sawi chiang duh.

Football-ah eizawng mi 100 nufa vel an awm ang a, a bak zawng chu individuial a thiam fal ṭhenkhatin hna leh eizawnna an hmu ve a, a bak zawng 80% chuan mahni thawmhnaw pawh an hlawh chhuak zo lo a ni. An ṭhat lai hun an khawhral a, Sports Association-in pawisa an pe thei lova, pek tur an nei bawk hek lo.

Sports Infra­structure-ah chiah pawisa a awm a, mipui tan sports hi eizawnna tling tih tham a ni lova, ṭhatlai hun sen thlawnna mai mai a ni. Chumi atana vaibelchhe tel PMJVK sum hman hi thil ṭul lo a ni a, Skill Development, Health leh Edu­cation atan hman tur a ni zawk.

Sports-ah hian pawisa kan seng ṭeuh ṭeuh a, kan infiammi inhliam chu ṭhianho intel khawmin an khul chhuak leh sia, khawiah nge Sports Department hi an awm le?

Inhnialna atthlak lamah kan kal bo laiin a pawimawh ber kan hlah tlat. Sports hi sum siam­na a ni a, eizawn­na tak tak a tling lo. Health leh Education aia PMJVK a Sports kan vawrh sang hi he Ministry tihsual (Blunder) lian a ni a, khua reiah ṭhangtharin an la dem dawn khawp mai.

- David VL Ralte, Dawrpui Vengthar