CORRUPTION LEH BAWK MAW!

Ni 18.2.2023 Vanglaini chanchinbu editorial kha kan lo chhiar ang a, Horticulture link road laihna sum cheng Vbc 2.94 lai tih chingpen a nih thu kha a ni a "Report of the Comptroller and Auditor General of India on Social, Economic and Revenue Sectors for the year ended March 31.2020 chu Chief Minister-in tun hnai khan assembly session-ah a pharh a. Horticulture deptt. hnuaia link road laihnaah sum hman dik loh cheng Vbc 2.94 a awm tih an chhui chhuak" tiin.

Hetiang thil dik lo, corruption lian tham tak hi Mizote hian kan ngai thutak tehchiam lo nge, corruption hi ngaiah neih tawhin kan nitin nunphunga bet tel ve tlat tawha ngaiin kan thêngthâwngah a thawk lo zawk ni ang le?

Ram mipui chanvo lian tak, zah pah lêk lova tih chingpenna a ni a, hetianga zahna leh ram mipui pawisakna nei hauh lova dik lo taka titute hi chhui chhuah a, hrem ni rawh se.

Thil buaithlak tak pakhat chu Mizo mipuite hi, changkang ve tawh viau angin lang mah ila, kan chanvoah hian kan chiang lo hle. Kan chanvo ti chingpentute ngaimawh nachang hre lo kan ni a, vei pawh kan vei teh chiam lo niin a lang fo. Hei hian mi corrupt-te a ti huangtau a, a ti ngampa a, "Mipuiin min chîkin, an ngaihsak tak tak chuang lo" ti ni âwm takin, duhtâwkin min run a nih hi.

Vanglaini editorial kha kan chhiar zêl chuan, "CAG report-a tarlan danin, kum 2018-19 khan NEDP sum cheng Vbc 26.73 hmangin horticulture department chuan departmental-in horticulture link road (all weather road) an lai a; hmun 134 ah an hnathawh hi zir chian a ni a, thil fel lo tam tak an hmuchhuak" tiin tarlan a ni - a zahthlakin a, tuartu tân a thinrim thlak hle bawk.

Lei laihna excavator hman (hire) hun chhung anga tarlan pawh, an hna­thawh hun chhung aiin a rei zawk a, chumi atana an pawisa hman man an pêk chhuah ringawt pawh chu cheng nuaih 72.15 a nih thu kan hriain kan chhiar a. Excavator registration number endik a nih meuh chuan, bike, scooty, car etc. number a lo ni reng lehnghal a, excavator hire na atâna pawisa an hman ral hi cheng Vbc 1.10 a ni.

Tarlan a nih zêl danin "CAG report hi a kal muang deuh ṭhin a, tun a mi hi 2018-'19 sorkar kuma thil thleng a ni a ..." 2018-'19 hnu lamah hian eng zât tak chingpen ang maw le?

He thil kan sawi mêk hi, horticulture department hnuai a mi chauh a ni a, a bak department dangah hian, hetiang dungthula mipui sum tih chingpenna hi eng zât tak la awm ang maw? Hetiang hi kan ram, Mizorama thil thleng mêk chu a ni si a, mumang mai ni se tih a châkawm hle a, mahse a tak ngei a thil thleng, a tak ngeia kan tawng mêk a ni lawi si.

Zêp nei hauh lova sawi chuan, tuna kan Mizoram dinhmun dik tak chu corruption lipui ah kan liluh mêk a, eiru duh tân leh zak theilo tân chuan chance a ṭha êm êm a, chu chu thu dik tak a ni bawk. Thu dik tak a ni tih ti fiahtu chu CYMA leh Mizoram Synod meuhvin corruption do turin ralkhel dâr an vaw tlat tawh a nih hi.

Mipuite pawh, NLUP cheng nuai khat leh SEDP cheng nuai thum man tum a tlan kawi tlan kawi hman kan ni tawh lo. Thaichhawninu man tum khan nghatê pahnih khat (râwt thak khawp pawh ni mang lo) bak kan man chuang tak tak lo a nih hi, sem leh dawn ringawt thupuia neih a hun tawh lo, hetiang hi kan ram tan a him lova, corruption leh dik lo taka chêt a ti punlun a nih lek fang hi.

I ram, i hmangaih, i neihchhun hmalam hun hi rilru fîmin thlir la, i ram a thil thleng dik lo tam tak leh i chanvo ngei tih chingpen sak i nih dan te kha hrethiam tawh la, i ram tan theihtawp chhuah la, kan hmelma doral lian corruption hi ti takzetin i do ang u hmiang.