MNF party a keh chhe thei

Mizorama party hlun leh thisen senga din ni bawk, rorel lai ni bawk, zuitu ṭhahnem tak nei mek ni bawk, 'Pathian leh kan ram tan' tia huaisen taka ke pen ṭhin MNF party hi fakna tur a tam rual hian tun hnaia an kal dan en hian keh chhiat hmabak an ang ka ti riau mai.

He party tana thi leh thau pawlha lo ṭang ṭhinte chuan an ni aia tlatlum party mi junior ni si an hmuh avangin an lungawi lohna hi a thuk tawh a, inthlan dawna contract in peka chin fel mai theih a ni tawh kher lovang.

Chief Minister-in MNF party mi leh sa nghet tam tak a neih laiin a hmelhriat hnaivai zawk chu OSD to CM atan a rawn ruat chhuak a. Amah hi sawisel leh fakna zuk hre ve mah suh ila Social Media lam kan en chuan mipuiin an fak si lo a ni.

CM hian OSD a duh pawhin vangvat kai chin pawh ṭhahnem tak an awm a, vangvat kai kher lo zingah pawh kum 20-30 chuang MNF ruhkawl lo ni tawh party tana thawk nasa sum leh tha pe phal lehkhathiam leh fing tam tak an awm laiin a hnathawh tur pawh hriat chian loh OSD to CM atan MNF party mi thar zawk a hmang hian Hnam Run chhung a tibuai hle a ni.

Minister hna sem khan Department lian tak tak chu party lama senior chuan an han chang ngei a, protocol lamah pawh a hnung bera an dah Minister of State ni bawk chu Sports, Tourism leh ITC pek a niin budget pawh a pe tlem hle.

CM duhsakna budget hmang hian pakhatmah a lang lova, mahsela SEDP sum te, project hrang hrang NEC leh Central lama CM blessing dawngtu chu Minister senior ni lovin Minister junior a ni zawk ta daih! Minister nih loh hlauh vanga âng ngam lo leh vuivai ngam lo ho hi tuna CM chet danah hian an lung a awi miah lo a ni.

PMJVK sum hi Minister Senior en­kawl Health Depart­ment lam pek a ni lova, Party senior enkawl School Educa­tion pek a ni lova party mi junior pek a nih chhan hi midang hriat loh a hriat vang lam ni lovin, CM blessing dawn vang a nih hmel a (state dangah lem Health leh Education in an hmuh theih chuan kan state pawhin a hmu ve thei tur a ni). He thil hi Hnam Run Secretary rualin langsar si lovin an phun pui neuh neuh a ni.

Party chak leh hlun ni si hi tun hnaia junior zawk an tlak tlum chhoh tak tlat avang hian a chhungril vuivaina a tam tawh a, inthlan kumah hian a keh chhe rup a nih pawh­in a inmung rei tawh tihna a ni.

Kum 2018 a Congress keh rup pawh kha a hmaa lo inmung rei tawh puak keh a ni.

- Lalchhanchhuaha Colney