Campaign an lo ṭan em ni?!

Vanglaini editorial-ah khan July ni 30-ah khan, "Inthlan campaign an ṭan a ni zawk em?" tih kha an rawn ziak kuau mai a. Ka ngaihtuah ngai miah loh dan daih khan an rawn ziak a, tun hnaiah State Election Commission-in VC leh Local Council inthlan a rawn puang nghal a, campaign na hun pawh awm mang lova inthlan nghal tur an rawn tih danah hian ngaih a ṭha lo rum rum dawn a lawm mawle, thil kal vel dan hi chu le.

Khatah khan, "Hetiang boruakah hian sorkar lamin a hnathawkte hlawh a bat ṭhensak a, a pe kim thei lo a, a chhan chu pawisa a nei lo nia a insawi vang a ni. Pawisa nei loa insawi sorkar hian hmun dangah chuan hnathawh a chawl chuang lo a, a minister-te ngei ngei pawhin tun hnaiah chhuang takin hripui karah hmasawnna an kalpui zel thute kha an sawi chhuak ang lawi a. Thil in kawkalh tak tak hi kan ramah a thleng mek, tih kha a ni.

A ziah zawmna kal zelah khan, "Heng thilte hi mipuiin mak tia kan thlir laiin kan hma lawka inthlan hrang hrang awm tur hre reng hian sorkar hian ṭan a la zawk pawh a ni thei a; hri leng avanga kan buai lai hian hna an thawk duh a nih pawhin ngawi renga thawh mai an duh lo a, an thawh ṭan hma hauha lung­phum phum aṭangin uar thei ang berin an puangzar a. Hengte hi kan hmaa inthlan lo awm tur thlir chunga sorkar chakna hmanga party invawrh tum­na a nih chuan a vanduaithlak hle a ni," tiin a inziak a.

A tawpah khan, "A hnathawkte hlawh pawh pe thei lo chunga a inham puar zawnga sorkar a kal ṭan ta tlat mai hi kan hma lawka Village Council, Local Council leh Aizawl Municipal Corporation inthlan lo awm tur atana boruak siam an tumna a lo ni reng lo maw?" tiin a tlip nghal bawk a. Chhiar nawn leh ila helai thu chauh pawh hian ngaihtuah a ti thui khawp mai mawle.