Mizoram theihna leh Horticulture Department hi

January 31, 2023 khan Chief Minister Pu Zoramthanga chuan, Mizoram Horticulture Service Association (MHSA)-in Tourist Lodge, Chaltlanga General Conference vawi 25-na a hman­puinaah thu sawi­in, horticulture lam kawng hrang hrang, pangpar, thei, thlai leh mau lamah Mizoramin hausak theihna khawp thar chhuak turin theihna a nei tiin, "Horticulture thar chhuah kan tih - thei, thlai, pang­par leh maute hi state economy tih­hmasawn a, hausak theihna khawp thar chhuak tura theihna Mizoramin a nei a ni," a ti.

Chief Minister hian Mizoram theihna hi a sawi châwk a, chumi titheitu Horticulture Department chu ama enkawl hi a ni nghe nghe a ni. Ṭha tak chuan enkawl ta se kan theihna a tih tam tak hi kan ti thei dawn a ni.

Tuna a enkawl dan hi chuan thei, thlai, pangpar leh mau hmang hi chuan state economy hi kan siam ṭha dawn lo tih hi a lang chiang tawh a ni.

News lamah kan lo hmu ve a. Comptroller and Auditor General of India on Social, Economic and Revenue Sectors for the year ended March 31, 2020-a tarlan danin, Horticulture Department hnuaia link road laihnaah sum hman dik loh cheng veibelchhe 2.94 a awm a, hei hi a tam lulai a ni. Hetianga mipui pawisa ti ching­pentute hi tute nge zawn chhuaha hrem chi an ni.

He pawisa hi a lan dan chuan MNF sorkar hma Congress hun laia NEDP sum dah kha a ni a, an hman hun hi 2018-19 kum a nih avangin MNF sorkar hnua hman tihna a nih hmel si a. Heti reng reng a nih chuan kan ram hi a dam lo a ni.

Horticlture hnuaia pawisa chingpen hi kan en chian chuan - Horticulture Department chuan Lunglei division hnuaiah Link Road thar 13 laihna leh kawng awm sa chei ṭhatna atan Exca­vator an hmang a. Eexcavator hire hun chhung nia an tarlan chu hnathawh hun chhung aiin a rei zawk daih a, hetah ringawt pawh hian cheng nuai 72.15-in an pe chuang a, hei hi eirukna langsar uchuak tak a ni.

Chief Minister hian a eiru tihna pawh a ni ngawt lova, a Department enkawlna hnuaiah eirukna lian tak CAG Audit Team in an chhui chhuah avang hian Mizoram theihna hi chu sawi sawi chi a ni lova, Horticulture Department hi enkawl fel phawt a ngai a ni.

- K. Lalengkima