LEIBÁ ENGTO TUR CHIEF MINISTER KAN MAMAWH
Ni 21. 2. 2023 (Thawhlehni) Mizoram assembly budget session neih mêkah, kan chief minister Pu Zoramthanga chuan, "India ram state zingah Sikkim-in cheng Vbc. 12982 bâin, an ba tlêm ber. Leibâ tlêm ber dawttu kan ni a, cheng Vbc. 12991 kan bâ. Sikkim nên kan inzah thuak. State dangte pawh an la, keini aiin an ba tam vek," a ti a.
A sawi zêlnaah CM (Finance changtu) Pu Zoramthanga chuan, "Leibâ hi hmân aṭangin kum tin a kal chho reng a, state zawng zawng kal dan a ni. Chuti lutukin ka engto lo," tih thu a sawi bawk a nih kha.
Kan state leibâ hi sawi nêp theih emaw, sawi tlêm theih pawh a ni hek lo, kan state leibâ leh mi state leibâ khaikhin chuan, a ba tlêm berte zinga mi pawh kan ni mahna. Amaherawhchu mi state leh kan state len dan (inthlauh dan) han khaikhinin kan leibâ hi a tlêm lo a ni, thawhchhuah lah kan nei tlêm êm êm bawk. Mizoram mipui nâwlpui ni tin khawsak phung han en lahin, mirethei ni tin eichawpa buai hi a tam zawk kan ni a, thingtlang lam khawsak phung hre phâk tan phei chuan kan khawngaihthlak lutuk, thawhchhuah innghahna tlâk sawi tham kan nei lo takzet a ni. Chutih laia, kan Chief Minister (Finance changtu) berin kan leibâ "Chuti lutukin ka engto lo" a han ti mai hi, ram a vei lohthlakin a manganthlak viau a ni. A lehlam takah chuan zêp hauh lova kan state leibâ a engto tehchiam loh thu a rawn sawi hi a fakawm letling phian, engto lutuk si lova engto lutuk anga insawia lemchan âi chuan a rilru dik tak, kan state leibâ chuti lutuka a engto loh thu a rawn sawi kha thudik tak a sawi a ni.
Heti hian ngaihtuah ta ila, entirna'n: Bank ah Khuma'n cheng 500000, Hlira'n cheng 300000, Lala'n cheng 80000 an bâ a, anni pathumte hi chu khawkhat pa awmthei, sorkar zêm zente an ni a. Chutihlaiin Hminga'n cheng 70000 bank ah a ba ve bawk a, ani erawh ni tina eichawp dap, nupui fanau chhangchhea tak châwm a ni bawk. Sum hnâr innghahna sawi tur a nei lo va, chuti chung chuan "Ka leibâ hi, chuti lutukin ka engto lo, a ba tlêm ber Lala dawttu chiah ka ni," tiin a dinhmun pachhiatzia ngaihtuah hauh lovin han sawi ta se la, a nupui fanaute tân chhuan B.P sâng neihna tham khawpa lungngaihna tur a ni ngei ang.
Mi bat tam avanga Hminga'n a leiba a engto lo ve ringawt ang khi thlamuanpui chi a ni lo, thlamuanna kebai a ni. An chhungkaw eizawnna leh an intodelh lohzia enin Hminga leiba cheng 70000 khi an chhungkaw tân chuan a tam lutuk, sawi nêp theih a ni lo. Hminga nupui fanaute chuan, "Kan leibâ engto tur Pa kan va mamawh êm," an ti vawng vawngin a rinawm. Hminga leh kan Chief Minister erawh class khata awm an ni tlat bawk si.
Vawiina Mizoram state-in kan leibâ cheng Vbc. 12991 hi, a changtu Finance Minister tân mai ni lo, ram hruaitu dangte leh mipui zinga a hawiharh deuh îk tân chuan phurh tham lawih a nih lai a, kan CM berin, "Chuti lutukin ka engto lo," min han tihsan mai hi, a mak a "Engtia awm thei nge mihringah" tih mai a awl a nih hi. Chuvangin kan leibâ (Kan state len dan en a tlêm lo tak) hi engto tham a tling tak meuh meuh va, chuvangin Mizo mipuite hian leibá engto tur Chief Minister kan mamawh takzet a ni.
- MC. Lalthianghlima