Written by
- Lalthansanga
Party Pahnih
Mizoram hi hun rei tak chhung chu 'two party system' an tih anga kal kan ni tiin kan sawi thei ang a, Congress leh MNF in state kan nih hnuah ro an la inrel chhawk ngat ngat a ni.
2018 inthlanah ZPM khan MLA seat 8 an rawn lâk ve takah khan tun hun tak hu multi party system angin kan kal ve angin a sawi theih ang a, party pahnih inelna ni tawh lovin Party pathum a lo ni ta a ni.
Party pahnih min hruai danah hian kan läwm hrim hrim em? Party pahnih hnuaiah hian Mizoram hian hmasawnna a hmù ṭha tawkin kan hria em? Party pahnih hnuaiah hian mipui nawlpui hian hmasawnna kan nei phak em?
Sorkar inthlak hian contractor leh contract hna thawk an inthlak kual mai mai a, a hna chhiat dan (ṭhat dan pawh) a inang reng tho lo em ni?
Mizo ṭhalai i nih chuan ngun taka i ngaihtuah zui tur zawhna ka neih chu, "Party pahnih min hruai chhung hian kan Chief Minister neih tawh te hi i duh zawng an ni em? Kan inhmeh tawk leh kan phu tawk Chief Minister kan nei nge ni a, hei aia
ṭhaa kaihhruai theih a nih tawh loh avangin kan Chief Minister te hi chu sem theih a ni lo e?" tih hi a ni.
Politics chu a tawpa tawpah chuan inthlana a tling tam tam dinchanna khawvel a ni a, kan ram kum 30 chuang min enkawl dan hi thlir vang vang ta ila, kan chunga rorel chhunzawm zel turin kan thlang tling leh mai dâwn em ni ang?
Hengte hi mipui nawl pui hian ngaituah chiang mang lovin "Thlan tur dang an awm chuang lo," tiin kan in lal chhawk tir chhunzawm leh mai mai dâwn em ni le?
Party pahnih chhiatna zuk chhui tur khawpin thiamnâ ka nei lo. Ka hriat chhun chu party pahnih chiahin min la enkawl a, an tlin tawk chu tuna mi hi a ni a, kan ram awm danah hian kan lung a awi a nih chuan party pahnih zinga pakhat zawk hi kan vote leh chur chur thei ang.
Party pahnih chin vote tham an awm chhung kha chuan mipui kha dem theih pawh kan ni love, thlan tur dang lian tham an awm lih vang a ni ang. Party pahnih kha kan vote chhawk zak zak a ni. Party pahnih ni lovin party pathum kan lo ni ta a, party pathumna hi vote tur leh vote loh tur lamah thurawn ka nei lova.
Mahse party pahnih hi chu vote nawn tawh loh tumna ka nei a ni a chhan chu Mizoram dinhmun ka phak tawka ka zir ve vang hi a ni.