Mawhphurhtu rilru, Kan chhe vek lo

Uchuak taka Induhsakna, dik lohna kulhbangin a daidan tlat si na hi a awm a nih ngai chuan, heng thawm bengchheng tak, ngaihnawm lo tak hian ram mipuite a tirûm vâwng vâwng a, beiseina êng neitu ṭhalaite a vaw chau ṭhin!

A fawng chelhtute hi engtik lai pawhin an pawimawh ber reng fo. An keu zawh sen loh zirlaibu hi chhawpin a awm reng mah se, hun tam tak pal tlang tawh an nih avângin, nimin aia vawiin ṭha zâwk siam tur hian, an tum tlat a, an duh tlat miau chuan, chaknaa thuamin an awm ang a, min chakpui ang a; hnehna bân an phar lai kan thlir ang a, an sah kuak sa kawng chu hlim takin kan zawh tawh ang.

Hruaitu hmasaten inzir chawp takmeuh leh mawlmang taka he ram leh hnam tan bul ṭan a, thlan tui nen la zai an lo pal chah tawhnate kha hriatsak ila, a zavaia haidersaktu chuan a ka chip hial rawh se!

Kan chhe vek lo tih inpawm ila, ṭhahnem kan ngaih luatah chintawk erawh nei thiam ila, vawiin aia ṭha zâwk din tura kan koa mawhphurhna awm ṭheuhte hlen chhuak turin, beiseina êng kan siam zâwk tur a ni ang.

Heng thu kan sawi avâng hian, heti chinah hian kan lungawi ta tihna erawh a ni lo.

A ram mipuiten 'Lee Kuan, kan lawm e,' tia mittui nena an thlah liam tâk khan a hun hnuhnungah eng thu nge a sawi khâ, "Thlan khura min zalh hunah pawh, thil dik lo a awm a nih chuan, ka lo kir leh ang," ti khawpin a ram, a hnam a hmangaih a, an lo inhlan ral a nih kha! An duh leh tum tlatna, an thu tihtluk ngamna chauh aia pawimawh a awm lo.

- Lalnunṭawma Fanai