Awmpui Nula/ Tlangval chungchang!
Ṭum khat chu tlai dar 5 pelhah in ka thleng a, zanriah kil a hun ṭep - choka lam a reh riau a. Ka'n thlek chiang a, kan nula (awmpui) a lo awm hauh lo! A pindanah ka'n kal thuai a, a thawmhnaw pakhat mah a lo awm lo zui - hostel naupang rual nen khami tlai khan rawng kan bawl luih luih a, a nuam zui ang reng phian!
Zirna in, hnathawhna hmun hrang hrang leh mimal inah te awmpui hi mamawh kan tam hle.
Singapore leh ram changkang zawkah phei chuan an tel lovin an khawsa thei meuh lo tih te kan lo hre ve zel a. Agency paltlangin Mizo hmeichhe tam tak pawhin thu dehkilhin a phuar hnanna hnuaiah India ram pawnah hna an thawk a ni.
Heng hmeichhe zingah hian chhuanawm tak tak, chhungkaw hmachhuan ni zui ta pawh an tlep tuarh. Agency lam nena an thu vuakthlak fuh tawk lo avanga thu in hmu lo ri leh zeuh ṭhin mah se, vawiin thlengin awmpui (maid) hna hi a la kal muah muah reng.
Ram dang chu dah ṭha ila. Kan ram lam hi thlir teh ang - mimal indawrna hnuaiah hlawh leh thawh tur inkawhhmuhin kan inruai a, buaithlak leh thinrimthlak ang reng hi a kat nawk zel!
Awmpui lam kutkem lo nei tawk, zelthel leh an thawh tur thiam lo hlawh um ve tho bawk si karah a ruaitu lam fel lo fê fê lah an awm ve cheu!
Awmpui leh a ruaitu inkarah hian palai hna lo thawk a, registration fumfe tak hnuaia thawktu leh chhawrtute hnuhma lo chhinchhiah fel thlap awm se. An sulhnu hmangin in ruai tawh mai se - rawih man chu agency/ farm lamin tel ta mai se.
Awmpui hna hi zahawm tak leh ṭangkai tak a ni a, kan mamawhna a nasa zual telh telh bawk a ni. Chhawrtlak leh rawihtlak mihring kawhhmuh theitu mamawhna a sang ta hle mai.
- Tpa Bunghai