MIZORAM ASSEMBLY BUDGET SESSION 2023 HI

Changkanna khawvelah kan cheng ta bawk a, digital hmasawnna pawh a kal chak chho em em a, kum sang hnih hma lama kan hriat ngai loh leh kan hisap phak loh thiamnain kan khawvel a tuam chho mek zel a, chutih rualin kei ni, ram kilkhawr taka chengte thleng pawhin he changkanna hian min han chim ve mek zel a Tichuan kan ram rorel khawl lian berina an rorelte pawh tun hma lama kan miththla phak loh chu mit leh beng ngeiin, kan tapchhak laizawl aṭangin kan lo hmuin kan lo hre ve thei ta. Ava ropui tak em! Tu hi nge legislator tha ni a, tu hi nge tha lo tih thleng pawhin kan thliar thei ta! Digital lama hmasawnna hi chuan kan tapchhak zawl a thleng pha ta bawk a, engtiang takin he hmasawnna hi la kal zel tak ang maw! I lo thlir zel teh ang u.

Kum 2023 Budget Session pawh a tir te aṭangin tapchhak laizawl aṭangin hmaih nei hauh lovin kan lo thlir ve ta a, a ropui ngei mai. Engtizia nge kan roreltute hi house a han thut vengvawng hi in peih loh viau thin te pawh min tih tir thin. Zawhna leh chhanna hunah pawh thutna ruak a tam fut thin a, tin paper present tih te, bill pawimawh lutuk lo sawi ni te, private resolution sawi nite hian engatinge maw ni house thutna hi ruak a tam em em zel le? Thingtlang lam aṭanga lo thlirtute pawh min ti beidawng rum rum zel alawm maw le! Sitting Allowance pawh in la vek awm si a! House a in han thut khah deuh hmar mai hi chuan kei ni, a lo thlirtute pawh kan phur thin teh asin le. In thut tlem em em nite hi chuan kan lo thlir ve thin si che u a, bei in ti dawng rum rum thin. Tul hle a nih loh chuan session ni te hi chuan in inhmanna chi dang, meeting hawn tih te, khawi lai emaw a khuallian a tan tih ang velte hi chu hnar ngam teh u. Media changkanna avang hian mipuite pawh hian kan roreltute hi kan bihzui thiam ve hle che u tih hi lo hre mawlh teh u.

Tlem lai, nikum lam khan Lehkha ngai lo session nei tur khan kan sawi tawhin, khawl changkang bun vek a, lehkha hman tihtawp tur ni khan sawi a ni tawh a. Tun tum session chu khatiang kha hmuh beiseiin ka lo thlir a, mahse kan speaker ber pawhin lehkha a la lek vu vu mai a, zawhna leh chhanna hunah pawh lehkha kan la lek fur mai bawk a. Zawhna pakhat-te pawh lehkha lek lovin kan zawt thei lovin, a chhangtu lam pawhin lehkha lek lovin an chhang thei nahek lo. Ka lo beisei leh hmuh ka tum ang ka hmu pha lo hi pawi ka ti hle mai. Tum khat kha chu zawhna zawttu pakhat, Dr.Vanlalthlana khan paper lam tel lovin, a hma a digital khawl hmangin zawhna a zawt ka hmu a,a lawmawm ka ti hle mai. A chhuan pawh a chhuanawm ka ti khawp mai. Khatiang khan in dawhkana digital khawl man to tak tak an bun sak che u kha hmang tangkai ula hmuh in nuam khawp ang a!

Kei ni, TV lam aṭanga lo thlirtute hian chuan zawhna leh chhanna hunte hi kan lo nghakhlelin kan lo thlahlel em em thin a. Zawhna zawttute pawh hian zawt thiam deuh ula, chhanna an pek a in zawh belhte hian hun ren thiam ula, tin, zawhbelhna hunah hian kha zawhna thupuiin a huam mang hleih loh, mahni bial lam tana tha tur ngaihtuah hian zawt kual vak vak lo ula kan lo ti thin. In zawhna leh chhanna aṭang hian kan ram kalsiam kan lo thlir reng a ni tih hi lo hria ula kan ti hle mai. Tin, zawhna chhangtu kan ministerte pawh tun ai hian tawng ran deuh tum ula, in chhanna pawh point tawi deuh, fel fai taka chhan tum ula, chu ti lova a history sawi duah hi chu kan ngaithla peih vak lo tih lo hre teh u.

Khawvel thiamna changkan azarah kei ni, thingtlang lam pawhin kan rorel khawl rorel inkhawm pawh an inkhawm lai ngeiin kan lo thlirin kan lo ngaithla thei ta a, a lawm awm takzet a ni. Kan roreltute pawh in fimkhur a, in rorel inkhawmah pawh chet that in tum a hun ta hle mai. Rorel inkhawmah hian tawng theih ringawt hi chu mipui lam hian mark kan pe sang lo, awmze neia thil sawi thiam hi mark kan pe sang fet zawk tihte hi hria ula. Hnial hrat ringawt pawh hi kan dah sang vak lo tih hria ula, thu awmze nei leh fing chhak chhuak thiam kha kan lo chhinchhiah reng che u tih in lo hre nawn fo dawn nia.

- Patrick Z, Chhingchhip