Eng tin Nge Kan IAS ve tehlul ang?

UPSC Results a rawn chhuak a. A hrâm peih peih an hrâm leh ta chuah chuah a. Mizo ṭhalaite min dem rawn leh ta. A hrim hrimah, thawka phita "Mizo ṭhalaite AIS (All Indian Service - IAS, IPS, IFS) leh Central Service lamah tling in tlem ta lutuk!" min ti sek(x!) ho hi, dikna chen awm mah se, min vulha min châwm liantu, hêng ṭawngkam chhak chhuak sex thintu - kan nu leh pa leh kan sorkar hrawn ṭhinte hi inen let ve ngam rawh se...

An fate min enkawl dan te, kan rama zirna (education system) an lo kalpui tawh thin dan zawng zawngte nen hian inen let ngam ve se... Dik tak chuan UT zo lo ber hnam kan ni hial ang em aw…vawiin thlengin kan UT-nun kha kan nu leh pate hian in la ṭhan hnan tlat a. Financial year kan tih mai (end of March)-a buai chûk chûk pawh sim 'thiam lo' ah min chhuah chho ta zel a. Mi'n mamawha an hman ṭhin sum hi nuam tawlna a nihzia in ṭhan hnan kha, kha rilru kha min tuh tlat . Mizoram pum Chief Manager/bureaucrat nih pawh thiam lo sorkar hruaitu, 'lal hle policy'-a neih tum ringawt fate tan IAS kawng hi a la thui deuh atin ni...

Kan sorkar hotu lu berin kan zirlai tiṭhate a lawmpui ṭumin, Vanapa Hall-ah meuh "Ei-Bi-C...Jhei-Khei" tih vel a zirtir ṭha leh a nia - khawi lama IAS! IAS officer nih aia Mau/Rua chin hlawk zawka a sawi chhung chuan a zirlai (a zirlai alawm) tuin nge IAS nih chak ang a?

Lehkha kan zirlaiin '3 Idiots' film ang mai khan, tum min neih khalh daih zel a; kan pian hma aṭang tawhin! AIS-a inziah tlin tum hian kan zirna kawngah min khalh bik em le?

Entertainment khaw­velah chuan kan chêng nasa ta viau hi a dik. Vaiho khu a nia, media nei ṭha a, Miss, lám thiam leh zai thiam thlan chu uar ni! A nihna takah chuan, kan value system min set saktu tur ber kan nu leh pate hi a ni lo'm ni, Cruz-a of Santa Barbara atanga Anurag-a min star-santute kha? Prem-a chah chhuaktute'n an fate tuna taka Miss/Idol/icon in lawm min tih leh tak si hi eng nge awmzia? Nangni ber kan entawn loh che u te'n! Chakma pa em ni kan entawn ang a? 

Tin, "Chakma pawh an tling thei a…" min tih khum leh si te hi, dawn fé tham. Pu Hriata Chhangte sawi dan takin, "Kei chu Chakma Chief Secretary neih te hi asin ka chak!" a tih hi ka pawmzawng a ni tlat! Heti zawnga ngaihtuah chuan : Mizo leh Mizo, Kristian ve ve, CM/Minister leh CS/Secretary/Commissioner inkawp ṭhin hi, a fuh mah mah a, an thawk dun thiam mah mah ṭhin a, ramin hma a sawn theih loh phah hial khawpin an thawk dun thiam ṭhin vang a nia, khi thu khi a sawi ni! 

Dik tak chuan tuna kan CS te hi, Hindu kulmuk ram Gujarat state siam ṭhatu zinga hna a thawh ṭhatziate kha. Narendra Modi-a ti-Modi tu ber a zuk nih kha... Hindu pa a'n thawhpui meuh chuan 'Kristian takin hna ṭha leh ropui' a zuk thawk thei a. Kristian CM/Minister te nen an han thawkho ta a, thenkhatin 'CM Spokesman' ang chauha an lo chhuahte hi ... ngaihtuah chian chuan na deuh a nia! 

Sawi tur ka ngah si. A thui zel dawn e. Ka sawi tum ber zawka chu, THAWKA PHITAH ṬHALAITE HI MIN DEM RENG BIK TEH SUH U. Ka lawm e.