MAU HI DAWITHIAM TIANG ANG MAI A NI – CM

G20-ah Chief Minister chuan a tihdan pangngai te-in duhâi a sâm leh ta chiam mai a. Keini mi pangngai satliah te pawhin nuihzat ena kan lo en tawh ṭhin hi keini aia mi changkang zawkte chuan engtin ngai tak ang maw!

Kan ram chu “Agriculture leh horticulture kaihhnawih thlai hrang hrang thar theihna” a nih thu sawiin a sawngbawlna hmun a awm loh avangin chû’ngte leh economic molecule lian tak kan neih a tih te ṭangkai taka hman a nih theih nan theihtâwp chhuah turin mi a sâwm a ni.

Kum 15 dâwn chutiang ti thei dinhmuna a din hnu-a eng vanga engmah ti si lo nge a nih? Chhuanlam an siam ṭhin chu ‘power kan nei tam tâwk lo’ tih a ni. Power siamna tura Central Sawrkarin cheng vaibelchhe tel a rawn pek te hi, 'Construction stage' 'Compensation stage' tih angrenga khawhral mai mai lovin, tih tak takin ti se, kan intodelhin hetiang tih nana duh tâwka hman tur power kan nei tawh tur a ni a. Lung ina tân phah hial khawpa awmten an lo tih luat vang a ni tih te hi kan haider zel dawn em ni ang?

Pâwnlam aṭanga lo lûtte chu awm mah se, power a awm si loh chuan eng nge an tih theih ang? Power tam tâwk an rawn phurh luh kan ring em ni ang?

Kan rama mau metric ton maktaduai 25 awm anga a sawi chu, dawithiam tiang (magic wand) ang maia hman ṭangkai theih niin a sawi bawk a. Eng vanga hmang ṭangkai si lo nge a nih? Chuti khawpa mau ṭha leh hman ṭangkai theih, hman sen loh a neih chu hmang ṭangkai lo mai pawh ni lova, eng vanga ram pawn aṭanga mau dang chaw lût nge a nih?

A huana mau lian a sawi te hi hmuhpui ve te kan awm em? Hetiang mau hi a lo nei tak tak te a nih chuan eng vanga hmun danga hmuh tur awm ve si lo nge a nih?

“Mizoram is one of the most economically developed states in the country” a’n tih ṭâlh ṭalh te kha, mithiam kalkhawmte khan engtin nge an ngaih ang? Central sawrkar aiawha lo kal ṭhenkhatte khan an chawmhlawm ti tiha awm mai kan nih zia te hi han sawiri ta se, eng tin nge an ngaih ang? Chapchar kût lawmna te-a kal vete chuan “Huau Huau Industry” chu kan intodelh vena neih chhun a ni tih chu an hrethiam ve nghal mai ang em?

Heng hun leh hmun te pawh hi Ṭawngvaihna remchangah kan hmang ta zel mai em ni zawk?

- M Lalmanzuala