MZU BUS SERVICE TIR CHUNGCHANGAH SORKARIN HRIAT SUAL PALH A NEI EM?

A thui lutuk loh nan thupuiah ka lut nghal mai teh ang.

Tun ṭum Session (11th Session of the 8th Mizoram Legislative Assembly) zet chu thlirtu/ ngaithlatu mipuite tan a hlawkthlakin a bengvarthlak hle mai. Kan Minister-ten an Department chan ṭheuha hmalakna hrang hrang mipui hriatah an han tarlang kha a lawmawm. Session kha live-in ka thlir ve hman vak loh avangin zan lamah youtube-ah ka lo thlir ve ṭhin a. March 23, 2023-a kan Transport Minister Pu Manuna'n sorkar hmalakna a tarlan MZU Bus Service chungchangah khan hriat sual palh a awm niin a lang. Kan thawhna nena inkungkaih a nih avangin han sawifiah ṭhain ka hria.

Minister thusawi kha a record aṭangin hetiang hi a ni: “Zirlai awm tamnaah leh kan zirna hmun sang tak MZU-ah regular taka City Bus-te a service theihna turin Aizawl City Bus Owners’ Association-te nen ruahmanna siamin tunah hian tlan ṭan tir tawh a ni a."

Kan Minister thusawi aṭang chuan tuna MZU-a City Bus service-te hi sorkarin a ruahman sak anga ngaih theih a ni a. Hetiang hi ni tak tak se duhthusam a ni a, a lawmawm khawp ang.

MZU-a Bus Service chungchanga thil nihdan dik tak chu hetiang hi a ni:

Mizoram University din tirh aṭangin Zirlaite class kalna atan University-in Bus a hire ṭhin a. Kum eng emaw chen chu harsatna em em awm lovin zirlaite tana Bus hire hi kalpui a ni. Amaherawh chu University sum rawn petu ber University Grant Commission (UGC) lamin duh anga sum min rawn pek tam theih tak loh avangin zirlaite tana Bus hire chhunzawm zel hi duhthusam a nih laiin harsatna a rawn awm chho ta a. Bus hire chungchanga harsatna awm hi University thuneitute, zirtirtu leh Zirlai Pawlte nen pawh vawi eng emaw zat sawiho a ni.

Tih ngaihna dang vak a awm loh avangin University thuneitu lam aṭangin Mizoram State Transport Department leh Aizawl City Bus Owners’ Association (ACBOA) hotute hnenah Public Transport/ City Bus service tir dan min ngaihtuah sak turin ngennate pawh siam a ni a, sawi te pawh sawiho a ni ṭhin. Mahse, sorkar lam aṭang pawn tihngaihna vak a awm rih lo ni ngei tur a ni. Vawiin thleng hian sorkar lam aṭangin emaw ACBOA lam aṭangin emaw Bus service tir hi a la awm miah lo.

Tuna MZU Zirlaite class kalna tura City Bus 11 tlan mekte hi Dean, Students’ Welfare (DSW) ruahman­puina hnuaiah zirlaiten anmahni pualin pawisa an thawh khawm a an hire a ni. Kan transport changtu Minister berin State Sorkarin ruahman­na siama ‘MZU-ah regular taka City Bus tlan tir ṭan tawh’ anga a sawi hi hriatsual palh a ni ngei ang.

Eng pawh nise, kan zirlaite hma­khua ngaihtuahin State Sorkar, Mizoram University leh ACBOA ten inpawh tlang taka ruahmanna kan siam a ngai. Tunah hian City Bus service pangngai chu Ramrikawn – Sakawrtuichhun thleng an kal a. MZU campus thleng service pangngai anga tlan tir dan ngaihtuah a ṭul khawp mai. Chutihruala kan ngaihtuah tel tur chu MZU campus-a tlan luha Ramrikawn lamah let leh mai lovin MZU Gate No. 2 lam aṭangin Tanhril khaw chhungah tlan luh tir nise Tanhril khawtlang tan pawh ṭangkai tak tur a ni. Hetianga ruahmanna hi enho/ sawiho tawh ṭhin a ni.

Tuna pawimawh hmasa ber chu MZU Gate No. 2 aṭanga Tanhril tleng kawng tlem zauha siamṭhat a ni. Hemi atan hian kan Rajya Sabha MP ṭhin Pu Ronald Sapa Tlau henah MP Fund aṭanga tlem azawng tih theih a awm takin tiin ka sawipui a. Vanneih thlak takin fund indaihlo em em karah Rs.10,00,000/- min rawn sih chhuah sak a, a lawmawm khawp mai. Amaherawh chu City Bus han tlan nan em chuan a la zim deuh niin sawi a ni a. Hei hi enhova laih zau hret dan tur leh a phah chhoh dan turte ngaihtuah theih nise chuan tuna kan zirlaiten pawisa thawh khawma Bus an hire hi ngai lo tur a ni.

Hetianga City Bus service tir a nih chuan campus-a Bus Stand dah mai pawh MZU thuneituten an sawi fo tawh. Sorkar lam aṭangin ‘MZU-ah regular takin City Bus tlan tir ṭan tawh’ anga sawi a ni ta sa sa, hawh u, tih dan ngaihtuah hovin i tlan tir tak tak teh ang u.

- Prof. Lalnilawma

Dept. of Extn Edu & Rural Dev’t.

Mizoram University