Politics Triangle mak tak

Mizoram inthlanpui kan hma­chhawn dâwn - Politics Triangle mak tak mai hmuh lo inring rawh. Tun hma zawnga MNF leh Congress inbei ngar ngar kha an inbei dâwn tawh mang lo. MNF leh Congress hian an survival atan ZPM an beih rawn a ṭul a, ZPM chak hi Congress leh MNF tán thil pawi tak a ni dawn. ZPM hi chak turin an lian tawk nge lian tawk lo tih erawh thil dang daih a ni.

(1) MNF tana a pawi dan: Indian political history thlir hian state khatah hian Regional Party lian Pakhat aia tam awmna a tam vak lo. National Party leh Regional Party lian hi an inbei deuh ṭhin. Mizoram hian rei tak chhung chu Regional Party leh National Party Congress an inbei tawh. ZPM an lo len palh chuan Congress hi ruhrel lian sâ bakah zawm pui nei Party an ni si a, MNF hi zawi zawiin an zuih tawlh tawlh thei a ni. MNF hian hei hi an hre chiang a, MNF hruaitute political speech tam zawkah hian an party hmelma kumhlun Congress aiin ZPM an bei nasa zawk a ni.

MNF tán kal zel turin an hmaa tualṭo party lian dang awm hi a hnawksak a, ZPM an len chuan MNF hi khuarei ah a dip ral thei. Hnam Party nia an in chhal bikna ang kha ZPM hi an in chhal ve thei. MNF innghahna zalenna sual leh 'Vangvat Kai' tih lah chu thil a lang fiah chho zel ta a, tun hmaa an nationalist spirit kha an phak tawh lo. Vangvat Kai an tih tuna Politician an la neihte hi MNF tichaktu ni loin MNF tihmingchhetu an hnaih ṭan tawh. MNF tán hian ZPM an lo chhoh palh chuan hniam sawt sawt na a ni thei a ni.

MNF in an läwm luh leh an thlem hi in lo chik chuan Congress mi leh sâ an ni mang lo ang, ZPM an ni deuh zel. ZPM mi leh sâ, pawisa a thlem theih zel hi an läwm lut ang. Inthlan hma hian hetiang hi a la awm zel dâwn a ni. Politics-ah chuan hei hi thil thleng ṭhin pangngai a ni. MNF hian sum an nei a, zawrh tur an nei bawk a, contract an la sawi hmuh thei a, an la sàwm chhuak dâwn chauh a ni. MNF tán vote neih zat inang rengah Congress sàwm aiin ZPM sàwm chhuah a finthlak a ni.

MNF mi leh sâ tana thil hriatthiam harsa tak chu rinawm takin an lo MNF ve reng tawh a, Party aṭanga hamṭhatna an beisei an hmuh loh laiin ZPM aṭanga an sawm chhuah tharten MNF sorkar zar an zo hmasa tur hi a ni. MNF hian ZPM mi leh sâ an lâk belh lai hian an beisei ang hmù lo MNF nghet sâ an chhuak ṭhen a nih chuan ZPM an beih luatah an mi leh sâ an veng lo tihna a ni. ZPM chhuahsan aiin MNF chhuahsan hi an tam tawh zawk a, mahse MNF hi chu ZPM aia lian zawk fe a nih avangin sawi a hlawh lo zawk a ni. MNF tán ZPM mi leh sâ lâk ṭhen hi a ṭul hle a ni.

(2) Congress tana a pawi dan: Congress hian India pumah hma an sawn thei lo. Hmasawn lo pawhin an nihna sâ kha hum thei se an la lian tawk. Congress hi an hnung tawlh a, an te tial tial a, a pawi hle. Congress hi Meghalaya, Nagaland leh Tripura lamah sawi tham an awm tawh lova an chet ṭhatna ber Meghalaya lamah seat 21 aṭangin seat 5 ah an tla ta a ni. Hei vang hian tun inthlanah hian Mizoramah ZPM an tlin palh chuan mipuiin Congress hi Mizoramah pawh an theihnghilh hlen thei dawn a, Congress tán chuan ZPM tlin loh hi a pawimawh hle a ni.

ZPM tling loa MNF hi an tlin leh chuan inthlan dawt lehah chuan mipuiin an ning tawh dawn a, party dang an lal ve a hun tiin Congress lamah mipui an kir leh theih beiseina an nei. Chu mai chu ni loin ZPM hi party rethei, sum hnar nei lo leh la sorkar ve lo an nih avangin tun inthlanah hian an chet chhiat chuan kum nga chhungin party intun dinna sum nei loin an zuih ral ve tial tial thei a ni.

Congress tán ZPM tlin a pawina chu mipuiin MNF thlakna atan Congress hmang loin ZPM an hmang ta tihna a ni dâwn a ni. Hei hi Congress tán thil pawi tak, Northeast state danga an ral thum ang bawka an ral ve theihna tur a ni. Congress tán tuna sorkar hi a la harsa a nih pawhin ZPM an sorkar bîk loh hi a pawimawh hle a ni.

Heng thil te avang hian Congress hian ZPM an bei vak vak hi thil mak a ni lo. Congress worker ten Social Media lama ZPM an bei pawh hi an tih tur dik tak an ti a ni. Congress tán chuan ZPM an tlin palh chuan Mizorama an ral theihna a ni, ZPM an beih hi an tih ngei ngei tur a ni a, Congress hian ZPM tlin aiin MNF tlin nawn tir an duh zawk a, hei hi politics chhiarkawp kalphung a ni.

Heti hian kan Mizoram politics boruak chu kan man thiam tawh ang, lol thum aṭanga inbeihna ni si, ZPM beih rawnna ni tel bawk si, mahnia sorkar duh ṭheuh si, mahnia tlin zawh loh hnua inrim kual leh dun dun tur si inbeihna Election kan hmabak a ni.

- Lalremruata