Session ka lo thlir ve dan

Budget Session chu phak tawkin ka lo zir ve a, kan Mizoram Session hrang hrang thlir hi chuan hmasawnna tur hi a la tam hle.

Mi ṭhenkhat chuan mithiamte thusawi lam ringawt kan fak a, a lehkhathiam lo zawkte pawh fakna tur an awm tho a, Session hi lehkhathiamte thiamna lan tirna tur a ni lo a, ram tana thil ṭha relna tur a ni zawk a. Dan siamna kawngah pawh khan ka rin aiin pawl 10 pawh pass lo kan MLA ṭhenkhat kha an fakawm zaw mah tlat a ni.

Chief Minister kha ṭum dang aiin a sawi tlem a, a ṭawng tlem na na na chuan opposition pawhin khak letna tur an nei lo a, kha kha party tan chuan thil ṭha a ni ve phawt maiah ngai ang.

A lemlam aṭangin han thlir ve thung ta ila. Chief Minister ni si kha a defensive em em sa a, tih tur lam sawi tur a nei vak lo a, tih tawh sawi mam leh zawhna chhan pangngai bak kha chu a lang tam lo.

Miin an sawisel luai luai Pu Robert Romawia hi kei chuan fakawm ka ti ve leh daih mai. Tun hmaa a lo chet tawh dan te leh a chet chhiat tawhna hrang hrang kha Social Media lama lar ber a ni chungin Minister a nihna zawnah a hnathawh dan en khan mi fakawm tak a ni.

MNF Minister dang kha an lawm vak lo a, Senior Minister phei chuan amah fakna Resolution kha an sawi ve miah lo tihte chu Opposition rilru kawi thu leh hla mai mai a ni a, mahni Junior zawkte fak kha an ba lo a. Minister chak leh hnathawk tak tak kan neia i fak mai ang u.

A ṭawng sual zauh kha chu PMJVK lamah DPR theh thla ve tho pawmpuina hmu thei loa Health leh Education department a sawi ang kha chu Junior Politician a la nih vang a ni a. Kha kha chu sawi loh atana ṭha zawk, Pu Thangtea leh Pu Chhantea chhuah zero na lam a kawk ve zawk thei a, a lehpekah chuan inzir a la ngai a ni.

Pu Ngunlian­chunga kha 'Best Debator' tih Title pek ka duh ve thung. A thusawi kha a hre chiang a, a sawi thiam a, Mizo mipui nawlpui tana ding ni loin a vote hmuhna tur bial mipui tana ding angin a in Project thiam zel a. Veteran Politician nge nge chu an lo fing leh pek ka han ti ang a, amah kha inzirna tham a ni.

Mi fak hlawh vak si loah chuan Pu C Lalsawivunga, ZPM kha Engliah-a 'passion' an tih nen hian thu a sawi thei ve leh tlat pek a. A tuichilh dan kha a ngaihnawm a, a mihliam thusawi hluah thei a ni.

- Lalthanmawia (Mamawia)