Mawhphurhna la ngam sorkar mipuiin kan mamawh

Kumin kan bul ṭan dan chu mitiin kan hria a, kan hun tawngin a zirloh vangin mipui, sorkar, kohhran leh tlawmngai pawl hrang hrangte chu kan kaldan phung pangngai ni lo, hun buaithlak, hun harsa ka hmachhawn mek a nih hi maw! Pathian rorel danah ringtu Kristiante chu lungawi mai tur kan ni tiin han inhnem ngawt mahila, kan hun tawn leh kan chunga thil thleng inang lo tak tak avang hian vuina kan ngah a. Lungawilohna, duhkhawp lohna leh kan nitin hun tawnah kan nei ṭheuh awm e. 

Heng hun harsa kan hma­chhawn mekah hian ram hruaitu, roreltu sorkar, a fawng chelhtute hmalakna leh mipuite himna kalzel dan tur kawnga an hmalaknaah duhkhawp lohna, ngaihdan inan lohna leh tih fuh tawk lohna tam tak a awmin a thleng thei awm e. Chung hunah chuan mawhphurhna tak tak la ngam sorkar kan mamawh hle niin alang. 

Kan sorkar hrawn mek Mizo National Front (MNF) hian he kan hun tawn khirh tak karah hian mipuite harsatna, himna, kan nitin mamawh lakkhawm kawngah leh hmasawnna tura hmachhawp kawngah hian hma an la ṭha tawk em? tiin zawhna mi tinin in zawt ṭheuh ta ila, kan ngaihdan leh hmuhdan a inang lo fur thei awm e. 

Engpawh nise, he hrileng hi kan duh reng vanga lo thleng a ni miau si lo a, ram khat hruaitute chuan kan hun tawn ang anga kan dinhmun inrelbawl leh chinfel chu an tih tur pawimawh tak a ni ta a. Tun hnaiah kan eibar nitin mamawh chak lakna kawng pawimawh tak mai National Highway 54 (NH54), Vai­rengte leh Kolasib inkar chu hmun engemaw zatah a chhiat tak avangin lirthei a bikin bungraw phur lian chite chu Kolasib leh Vairengte inkarah a tangkhang ta ṭeuh mai a. Chu chuan harsatna a thlen piah lamah hrileng kan hlauh em em mai heng lirthei khalhtu ram dang aṭanga rawn lut zingah hri kai hmuh chhuah a ni ta leh zel hian heng lai kawngin a paltlang mipuite rilru a ti phawklekin a ti ralti leh zual hle mai. 

He thil thleng mek avanga harsatna awm te enfiah chu sorkar tih makmawh a ni a. Ralkhat aṭanga a him chinna en liam ngawt mai chu a fel lo niin sorkar hotu lute Dt. 7.08.2020-a Council of Ministers inhmukhawm chuan an hre ta a ni chek ang chu, a tuk la la ni 8.08.2020-ah Kolasib leh Vairengte inkara lirthei tangkhang avanga harsatna thleng leh hri kai hmuh chhuahna hmuna mipuite thlamuan a, enfiah turin Minister of State pathum, Pu Lalchhandama Ralte, Pu Lalruatkima, Pu T.J. Lalnuntluanga te chu kalin thil awm dan an enfiah ta a. Kolasib District thuneitute nen ruahmannate siam hoin, a hmuna chin fel theih ang ang te an rel tih sorkar thuchhuah chuan a tarlang a ni. 

Minister pathum hian driver leh handyman-te Rapid Antigen Test (RAT) hmangin Vairengte checkgate-ah  screening test nei vek turin department lam hotute nen hma an la nghal a. Chuta thawktu indaihlohna pawh Health Minister te nena inrawnin Laboratory Technician pawh lak belh nghal tura tih a ni. Doctor leh Health Care thawktu pawh dah belh nghal tura tih a ni bawk. Heng bakah hian lirthei tangkhang zingah eirawngbawlna LPG leh POL phurtu ṭhenkhatte chuan an bungraw phurhte dahlet leh tumin an kir leh a, Bilkhawthlir daiah dan niin khawtlang hruaitute nen ruahmanna siam hoin a rang thei ang bera an bungraw phurhte a thlenna hmuna dah a nih theih nan a ṭul anga hmalak ho nghal a ni. 

Covid laka chhiatna nasa zawk a thlen loh a, Zoram himna tura hmalakna  kalpui bakah nitin mamawh chawk luh kawngah harsatna awmlo turin sorkarin a theih tawp a chhuah zel dawn tih Minister te chuan an thuchhuahah an tarlang bawk a ni. 

Heng ni khat thil thu a sorkar hruaitu Minister-te hmalakna hi a thlamuan thlak em tih Zoram mipui nawlpuite rilruah in zawt ta ila, kan ngaihdan a inang lo fur awm e. Kan rilru ṭheuhah za-a za pawm tawk leh pawm lo tawk kan awm ngei ang. 

Engpawh nise sorkarin a tih theih ang leh a mawh­phurhna-a ngai a, hma la a, hrileng kara hmun him lo zawkah pawh che chhuaka hma an lakna hian kan ram kal chhoh zelna turah hian ‘Mawhphurhna la ngam Sorkar,’ kan mamawh takzet a ni tih a tilang chiang hle niin a lang.