A saseha bawhzui a ngai (Tuikukte vote thlaktir thu)

August 27, 2020-a Village Council leh Loal Council inthlanna neih turah Bru-te vote thlak tir tur leh in Candidate tura phalna pek an nih chungchangah sorkar demna lam hriat tur a awm nual a, he thilah hian thu bul bal leh nihphung kan hriat chian a tha awm e. 

State Election hotute sawi danin, VC leh LC inthlanna neih turah hian kum 2018 Assembly Election neih tuma Election Commission of India pawmpui Electoral Roll behchhana vote hi siam a ni a. Hemi dungzui hian State Election Commission lam pawhin Electoral Roll hi a siam a ni. 

Roll hi hun rei tak kal tawh aṭanga ennawn niin, Covid 19 hri leng vanga hun engemaw chen chawlh lailawk a nih hnuah tun hnai khan chhunzawm a ni a. ECI-in a pawmpui Electoral Roll-ah hian Bru vote nei an awm nual avangin heng mite Electoral Roll chu Mamit Bawrhsap Pisa kaihhruaina hnuaiah ennawn a ni. 

Hetah hian Bru vote nei tura tihna hi dodal emaw paih tura ngenna an dawng lo a ni. State Elec­tion Commission hian Electoral Roll siam chungchangah thuneihna a nei lova, Roll siam ṭha tur emaw, Roll aṭanga paih emaw ngai an awm a nih pawhin mipui aṭanga hriattirna an dawn a ngai. 

Hun rei tak 

aṭangin Mizorama tlawm­­ngai pawl intel­khawm, Joint NGO Coordiantion Committee chuan Tripura-a awm mek Bru-te chu Tripura-a inbengbel tur leh Mizoram Electoral Roll aṭanga paih turin an lo ngen tawh ṭhin a. Hnam hnatlang pawh kan lo nei tawh a nih kha! Hemi ang hian kumin kum tir lama Union Home Minister, Pu Amit Shah hova Mizoram leh Tripura CM, Joint NGO Coordiantion Committee leh Bru aiawhte ṭhukhawm chuan Tripiura-a awm Bru zinga Mizorama kir duh lote chu Tri­pura-a in benbel a phal sak a. Tripura khua leh tui nihna pawh pek tura tih an ni. 

Inthlan dawn leh hun engemaw-ah Bru-te chu Tripura-a awm tura kan duh ṭhin viau laiin a buaipui leh bawhzui hunah kan che chak tawk lo deuh ṭhin niin a lang. Tun ṭum VC leh LC inthlan turah pawh hian Roll ennawn a nih lai khan Bru-te hi sorkar laipui hriatpuia inremna lo siam tawh anga Roll aṭanga paih tura dil ni se chuan, he buaina hi a chhuah a rinawm lo a ni. 

Eng pawh ni se, tuna kan thil tawn hi min beng harhtu ni se, anmahni duh thua Tripura-a awm duh Bru-te chu Tripura khua leh tui dik tak an nih a, Mizoram Roll aṭanga paih hlen a nih theih nan kan tlawmngai pawlte hian chak zawkin bawh zui se a duhawm hle. 

Thir chu a lin laiin deng rawh tih a nih kha maw!