Pension kum tihtlem ka rawt e
Mizoram sorkar hnathawk inzawmkhawm, Federation Mizoram Govt. Employees & Workers chuan sorkarah ngiat eng emawzat an neih zinga pension kum, kum 60 aṭanga kum hnih belha kum 62 turin sorkar an kar mek a, a hlawhtlin a rinawm lo.
Sorkar sum, hmasawnna tur pawh awm lo khawpa a hnathawkte tan an hlawh leh hamṭhatna hrang hranga a kalral mek laia DA tihpun an ngiat mek te, pension kum tihpun an ngiat te hi eng rilru pu a ti nge an nih le?
Sorkar hnathawk lo, lehkhathiam leh vengva tak tak a sing tel an awm mek lai leh, sorkar hna an inchuh mup mup laia an hamṭhatna lo kherh chiam hi mipuiin an thlawp lo bawk a ni.
Kumin kum tawp maiah inthlanpui kan nei leh dawn a, chuta tan chuan party tin an in puahchah mek a. Sorkarna chelhtu MNF pawh nasa takin ṭan a lak mek lai hian a nak nemah zen tumin Federation chuan an hamṭhatna tur la vawngin sorkar an nawr na telh telh dawn chu a ni phawt mai le.
Mipui chanai zawng zawng eizotu sorkar hnathawk hi kan haw miah lo a, rinawm takin sorkar hna pawh an thawk. An hlawh leh hamṭhatna aṭangin mipui pawhin chan kan nei tih chu hai rual a ni lo. Sorkar hnathawkin hlawh la har se anmahni aiin miretheite kan buai zawk tlatna state-ah hian eng hmasawnna mah a kal thei meuh lo chu a nih si hi.
Tunhnaiah Federation lam an meeting a, an thil nawr chu chak zawka nawr turin Chief Minister hial an hmu a. CM pawhin a ngai pawimawh a, a officer lian ho pawh kokhawmin an in rawnkhawm nasa hle tih kan hria. Inrinni office chawlhah pawh vawi 2/3 an meeting a, CM pawh vawi hnih ngawt an hmu a nih kha. CM lamin pension kum tihsan chungchangah chuan NGO leh zirlai pawl te nen inrawnkhawm a rawt kha a finthlak khawp mai.
Engtikawng mahin NGO leh zirlai pawlte hian pension kum tihpun hi an phal dawn lo a, mipui nawlpui pawhin kan phal dawn bawk lo. Kei chuan pension kum hi kum hniha tihtlem a, kum 58 ah ti nghe nghe se ka duhdan a ni. Kan tu leh fa, theihtawpa lehkha zir a, sorkar hna phak tawk thawh ve beisei em emte hian pension kum tisang se an ṭap zawih zawih thei hial dawn tih hi kan hriatpui a ngai khawp mai.
Chuvangin pension kum tihsan ngiatna hi an sut leh ngei beisei ila, Sorkar (ministry) pawhin hei hi dal ngam ve se, inthlan dawn avangin dawih dui suh se.
- Lal Rinmawia