AN RETHEI NAA AN VA CHANGKANG VE (B20 Delegate)

Wow, wow wow, this is Mizoram. An tlang ram hring dup mai chu, van sang aṭang pawhin a va hmuhnawm em! Ekhai an boruak pawh a nuam a nih hi le! Pathian malsawmna an dawng nasa a nih hi.

An Airport cute pawh a cute tak tak a nih hi. Tun hnaiah an lo chei ṭha a ni chiang mai. Khai a, mikhual lawm an va thiam em em ve aw, an hmel hmuh a nuam, an hmel hlim chuan min va ti lawm em.

AN TALENT CHU AW: Hetiang ram kil khawra awm si, an ṭhalaite talent neih ṭhatzia hi, zai leh lam an thiam dan em em te hi aw, ral khata Rimawi Ram tia kan lo hriat ṭhin chu a dik ngei a nih hi. Mi zawng zawng hi an zai thiam emaw tih mai tur a nih hi. An che vel reng reng a smart tlat. Incheina pawh an uar hle mai, kan hmuh phak chinah an incheina aṭang ringawt chuan Japan ram pawh min ti hre chhuak rum rum mai alawm.

Thil siam pawh an thiam khawp mai, furniture leh khawl thil ṭha tak tak pawh anmahni duan chhuah an lo nei ve nual. Training ṭha pawh dawng si lovin, anmahnia an tih chhuah liau liau min hmuhtir a, talent ṭha tak nei hnam an ni chiang mai.

AN IN LEH LO PAWH HI: Kham pangah in mawi tak takin an sa a, mit a va ti tlai ve aw, an in chhungte lah chu khawpui ropuia chengte khawsakna nen a inang reng alawm. Thil mawi pawh an hria a nih hi, an rilru hi a changkang tlat. An ṭhalaite hi mi thiam tak tak leh talent nei ṭha tak tak an tam hmel si a, an future a bright a nih hi.

LIR THEI PAWH AN NEI THA: An changkanna em em chu, heti khawpa kawngpui chep leh lirthei tamah hian, ‘silent city’ an tih chu a lo ni ngei a nih hi. Mipui nun a changkan avangin an traffic discipline pawh a va ṭha tehreng em. Mi zawng zawng hmel hlim takin an che suau suau mai hi, an ram nawmna tak a ni. Lirthei pawh an nei ṭha, a fai ṭha hlawm bawk si. An changkang a nih hi.

MAHSE (A BIG BUT): An khawpui hlimthla aṭanga thlir chuan, ram intodelh leh nuama sawi theih chu a ni. Mahse an ram thawh chhuah te min han hrilh a, intodelhna tham reng reng an la thawk chhuak lo. Anmahni mamawh pawh an la thawk chhuak zo lo tlat, thawh chhuah theih an neih min hrilh a.

Ram vannei taka awm an nih tehreng nen, an thlai tharte lah khawvel hmun dang aia quality ṭha an thar chhuak thei a. Sik leh sa, ruah tui tla an dawn dante kan han hre chiang deuh deuh a, ram ṭha tak Pathianin a pe a bawk si a, mahse an ram ṭhatna an la hmang chhuak lo tlat mai hi khawiah emaw fel lo a awm a ni ngei ang.

Talent ṭha tak tak nei ṭhalai rual an awm ṭeuh a, an talent hai chhuahsaktu an mamawh a, mahni maia a kawng dap thiam lo, puitu leh an thawh theih nana sum ngaihtuahsaktu an neih huna, intodelh mai ni lo, ram dang pawhin an chhawr theih thawk chhuak thei tur ṭhalai rual an nei a. Mahse an talent up behin a la awm si.

AN RAM HRUAITUTE HMEL HI: An ram hruaitu atan mi hausa leh khawsak sang an thlang chhuak ṭhin emaw ni? An mum kung hlawm mai a, in leh lo pawh an nei ṭha hlawm khawp mai. Ram vei vanga lua kel sam ṭo ṭhawt khawp hmel hmuh tur an awm ve lo. An mipuite tana thluak chawl lovin an phe buai lo tih, an hmel en aṭangin a hmuh theih. Central sorkar chawm hlawm piahah, sum bat tam tak nen an ram an kaihruai mek tihte kan hriat belh zel a, bat sawi mawi pawh an thiam viau ni tein min hrilh lehnghal. Hei ber hi a nih dawn hi an ram mutan chu.

RAM VANNEI: Theihna an nei a, an ram ṭhatna an hai chhuah hunah, B20 hi an chhawr ṭangkai ang. Chutih hunah chuan Mizoram chu ram nuam leh ram intodelh a nih hun tur mitthlain kan hmuhpui thei. A kawng sialsaktu an la nei ṭha lo mai mai zawk a ni.

A ram mipuite chu tih nuam tak leh thu awih thei tak niin an lang tlat. Talent pawh an nei ṭha, Pathian malsawmna an dawn zozai hi, hai chhuahsaktu hruaitu ṭha an mamawh a ni.

- Lalrinliana Colney