ENG NGE KAN TIH THEIH?

Hri hi kan hnaih a ni ta mai lo. Kan chènpui tawh a, kan inchiahpiah ṭan a, eng anga nasain nge kan inkaihhnawih tawh kan hre seng lo ṭan ta zawk niin a lang. Hri kai finfiah tam zawk lang chhuak lova an dam leh zel danah hian, hri kai, kai tih inhre lo, finfiah (test) loha dam pawh kan awm nual tawh ang tih a rin theih. 

Pastor-in a vei tih kan hriat rual khan a ram pumin kan inkharkhip a nih chuan, tunah phei chuan kha aia nasaa inkharkhip tur kan ni. 

Mahse, kan pawngpaw inkharkhip reng ringawt chuan, hri lakah kan him a nih pawhin, kan economy a tlu sawp dawn tih kan hrethiam ta. Inkharkhip hi hri ûm bona ni lovin, a darh chak tur venna mai a ni. Darh chin leh darh hun a nei dawn tho tho. Nunphung buai lutuk lova, daih rei zawka kan inven him theih dan tur a awm em?

Eng nge kan tih theih? Rawtna:

1. Tualchhunga khauh taka mipui kharkhip ai chuan ramria khauh lehzuala inkharkhip hi a awlsam zawkin a ‘effective’ zawkin a rinawm. Thla khat emaw chhung chu ram pawn aṭangin Mizoram ramri chhungah mi tu mah lo lût hrih lo turin inkhuahkhirh thar leh ta ila? 

2. Eng nge kan ei ang? Bungrua hi Bairabi relah chauh thlentir ni se. Rel aṭangin crane hmanga thiar thlaka Mizoram truck-a phurh luh ni se. Tunlai hian, mimal in sa pawhin mini-crane kan hmang thei tawh. Sorkar tan crane hman a har lo vang. Rel lo thleng hmasa chuan crane chu rem khawm turin a rawn phur nghal thei mai ang. A nih loh vek chuan, phai truck thil phurh chu Vairengte-ah (crane hmangin) Mizoram truck-in lo la chhawng mai rawh se. Bungraw phurh ziahna lehkha (challan) on-line veka chinfel ni bawk se. Tih theih dan a awm ang em?

3. Kan la tuar chhuak lo va, kan tuar ṭan dawn chauh tih mipui hian i pawm ang u. Kut sil, hmai tuam leh pawn chhuah loh mai ni lovin, mamawh neih tlem, intuituah loh bakah, nghei lo tawka inren thiam i zir thar leh ang u. 

4. Inkhawm, lehkha zir leh exam meuh pawh ngam lova mipui kan thlabar laia sorkarin inthlantir min tum hian mipui ralkhel a tizual. Inthlan dawna mipui tihlungawi loh hlauhna avangin, official-te duh dan aiin LTF duh dan a lal ṭan. Hei hi hri darh chak phahna a ni palh thei. Mipui thlabarin thlamuan kan mamawh lai hian, kan ministry hian vote min zawnsan lovin hri min dopui hrih zawk ula, vote in hmuh ṭhat phahna a la ni zawk lo’ng maw?